Babaye sa kabaret
Gula 4
Wala mahimutang ang bukidnon nga si Berto diha nga ang babaye nga iyang gikasayaw maoy migakos kaniya og hugot. Mikabyon pag-ayo sa liog ni Berto ang babaye nga nangalimyon sa kahumot.
Sukad-masukad karon pa nakasuway si Berto niini nga matang sa sayaw. Wala tuyoa ni Berto nga nanginit ang iyang kalawasan. Mibarog paghinay-hinay ang pribado’ng parte sa iyang lawas diha nga nabag-iran sa pus-on sa babaye nga mikabyon sa iyang liog.
Apan natingala si Berto kay ang tukar nga ilang gisayawan dili man humanon sa pagtukar unya ang babaye nga iyang gisayawan mangayo man kaniya og tiket. Nakabantay si Berto nga kada human sa tukar, pangayoan g’yud siya’g tiket sa babaye.
“Karon pa diay ka makasulod og kabaret?” nangutana ang babaye kang Berto. Sanglit saba man kaayo ang tukar, mapugos si Berto sa pagpaduol sa iyang baba ngadto sa dunggan sa babaye nga iyang gikasayaw aron madunggan ang iyang isulti.
Ang babaye mohangad usab og gamay kang Berto kun adunay isulti. Hinayaw kaayo si Berto didto sa ilang baryo sa Badian apan wala siya makasuway nga ang babaye na mismo ang mopiit ngadto sa lalaki sa pagsayaw.
Humot pa gayud kaayo ang mao nga babaye. Nahinumdom si Berto sa gisulti sa iyang pag-umangkon nga si Elizar nga dili magpalupig. Dali ra kaayo nga gigamhan sa iyang pagbati si Berto tungod kay kanunay nga mabag-id ang iyang pundiyohan sa pus-on sa babaye. Anam-anam nga gigakos paghugot ni Berto ang babaye nga iyang gikasayaw. “Kana ba, gakus g’yud pag-ayo, ayaw pabentaha,” sagol-komedya sa babaye ngadto ni Berto. Igo lang mingisi si Berto.
Huna-huna niya nga dili siya angay’ng mauwaw kay ngitngit kaayo ang sayawan ug halos dili magkakitaay ang mga nanayaw. Miabot ang higayon nga nahutdan sa tiket si Berto. (Sumpayan)
- Latest