Guwapa nga piniriso - Gula 6
“Wala ka diay magkomedya nga imo ko nga piyansahan?” giingnan ni Jenny si Samuel kay nagtuo ra g’yud diay siya nga komedya ra ang giingon sa higala nga tabangan siya nga makapiyansa.
Apan mikalit pagkisdum ang panagway ni Jenny. “Unya asa man diay ko og ibayad Sam?” matud ni Jenny. Misamot ang gibati’ng kalipay ni Jenny diha’ng giingnan siya sa higala nga siya ra ang bahala sa bayad.
Sa kalit lang migakos si Jenny kang Samuel tungod sa hilabihan nga kalipay. “Salamat, salamat g’yud kaayo Sam. Hulog ka sa langit alang kanako,” matud ni Jenny nga wala makapugong sa paglugmaw sa lusok sa luha gikan sa iyang mga mata.
“Basta, ugma’ng adlawa Jen, paninguhaon namo nga makagawas ka na gikan sa prisohan. Bahin sa imong kaso, ayaw kabalaka kay sa akong paniid kaganina, huyang kaayo ang ebidensya ug sigurado nga maabswelto ka,” gihatagan og paglaum ni Samuel si Jenny.
Sa wala pa mobalik si Jenny ngadto sa iyang selda, nagtinutokay sila si Samuel. Salabtonon kaayo ang ilang mga tinan-awan. Nagpig-itay sila sa ilang masi’g ka mga kamot sa dayon nila nga pagbuwag-buwag.
Tuod pagkaugma, abtik nga nahikay nila ni Samuel ug sa kawani sa bonding company ang release order alang ni Jenny. Gipirmahan na sa huwes ang release order nga gi-address sa huwes nga naghupot sa iyang kaso.
Mga alas dos pa sa hapon ug bana-bana ni Samuel may higayon pa nga makagawas si Jenny gikan sa Cebu City Jail. Gisuwerte si Samuel kay adlaw diay sa tingbisita sa mga piniriso ug makahimo siya pagsulod sa selda ni Jenny.
“Jen, mahimo ka na nga mogawas. Miisyu na ang huwes og release order ug tua na sa warden’s office. Sige na, panghipos na sa imong mga dad-onon,” giingnan ni Samuel si Jenny. (Sumpayan)
- Latest
