Rape victim - Gula 13

Gisugid ni Lanie kang Richard ang kinatibuk-ang hitabo ngano nga nalugos siya sa tawo nga sagad mag-atang og iyang mabiktima daplin sa sapa ug kun ngano nga iya kini’ng napatay. Gibati ug dili tiaw nga kaluoy si Richard kang Lanie.

“Ayaw kabalaka Lan, bisan og nasayod ko nga biktima ka sa pagpanglugos, wala kana makapausab sa akong paghigugma kanimo. Hinuon, nakapasamot kana sa akong tinguha nga lipayon ko ikaw human sa mapait mo nga kasinatian. Ililong nato nga ikaw ang nakapatay sa rapist, ako na ang mahibalo nga mohimo sa report ngadto sa akong hepe,” ni Richard.

Tumang kalipay ang gibati ni Lanie diha nga nadungog niya ang mao nga mga pulong gikan ni Richard. Gigakos niya pag-ayo ang police detective nga karon iya na’ng boyfriend. Gihagkan siya ni Richard ug nag-ukobay ang masig nila ka mga ngabil.

Nag-anam na kangiob ang palibot sa mao nga dapit ug nag-anam usab kainit ang ilang pagparayganay. Ingon sa hapit na sila madala sa kusog nga bul-og sa ilang mga pagbati sa nagpadayon nila nga pagparayganay.

“Ayaw isipa nga magpahimulos ko sa higayon Lan, apan ingon sa dili na ko makapugong sa akong kaugalingon,” hagawhaw ni Richard ngadto kang Lanie. Nakasabot si Lanie sa buot ipasabot ni Richard kaniya.

“Itugyan nako kanimo ang akong kaugmaon Richard,” ni Lanie pa nga miparayeg pag-ayo sa police detective.

Anam-anam nga gipanangtang ni Richard ang mga salimbong sa lawas ni Lanie. Gipasagdan ra usab sa dalaga ang iyang boyfriend nga polis nga mitagsa-tagsa pagpanghukas sa iyang gisul-ob. Mihari ang tumang kahilom sa mao nga dapit samtang gidimdim nila ni Lanie ug Richard ang katam-is sa gugma. Nagpabiling tanghaga sa katawhan kun kinsa ang mipatay sa tawo nga gituohang rapist ug sila ra si Lanie ug Richard ang nasayod sa kamatuoran. (Kataposan)