Love ko si doktora

Gula 4

Wala g’yud sipyata ni Dra. Marlyn ang pagdapit kaniya ni Marco. Gihatagan pa gani niya og birthday gift ang ulitawo. “Salamat nga nia ka g’yud Mar. Abi nimo, dungan na kuno ni nga selebrasyon ingon si Daddy kay ako maoy napili nga magna cum laude sa among klase,” ni Marco pa.

“Uy, congratulations Marco to your achievement,” matud ni Dra. Marlyn nga wala makapugong sa pagbiso-biso sa ulitawo. Wala maanad si Marco sa pakigbiso-biso ug gibawsan niya’g kiss ang aping sa amiga niya nga doktora.

Daw nakalitan si Marlyn. Nahatutok siya kang Marco. “Gikasuko mo ba Mar nga mi-kiss ko nimo?” gisukna ni Marco ang doktora. “Wala uy, natingala lang ko ngano nga imo ko nga gi-kissan nga biso-biso ra man unta,” sa doktora pa nga nagpahiyom.

Didto gipalingkod ni Marco si Dra. Marlyn sa lamesa sa iyang mga ginikanan ug suod nga kabanayan ug mga higala. “Uy, mao ba kini ang imong girlfriend Marco?” pangutana sa tabian nga iyaan sa ulitawo.

“Ha? Dili pa, aw dili tiya uy,” nagkabunga-bunga og tubag si Marco. “Pareson baya mo’ng duha dong,” dason sa laing iyaan ni Marco nga naglingkod sa ilang atbang ug nagsige og tutok ni Marlyn.

“Nauwaw kaayo ko uy kay gisigihan ko nila’g tutok,” matud ni Marlyn nga mihagawhaw ngadto ni Marco. “Sukol sa komedya kay komedyante kaayo na si Tiya, igsoon na ni Daddy Roman,” ni Marco.

Human og abi-abi ni Marco sa iyang mga higala ug bisita, mibalik siya didto sa lamesa nga gilingkoran ni Dra. Marlyn ug nagtupad sila sa pagpangaon. Nahimuot kaayo ang kabanayan ni Marco diha nga gisuginlan nga nagkaila sila si Marlyn kay mao kini ang nakadam-ag sa ulitawo nga nagsakay og motor.

“Nindot hinuon na nga dili gayud makalimtan ngano nga nagkaila ug nagka-amiga mo’ng duha dong. Kanindot kun magkadayon mo, may pag-umangkon na usab ko nga doktora,” laing komedya sa iyaan ni Marco.

Mingisi si Marco. “Maayo kaayo og sugton ko ni doktora, Tiya.”  Gikusnit ni Dra. Marlyn ang paa ni Marco ilawom sa lamesa. (Sumpayan)