Ang higala ni Juliana
Si Juliana nga usa ka basurera nga biyuda, nakaangkon og puwesto sa dakbayan. Kada kaadlawon, nga siya mag-ukayan og basura sa eskina V. Rama Avenue ug dalan Kabajar.
Tungod sa iyang kamatinahuron ug kamahigalaon, nakaila o nahigala na niya ang kadaghanan sa mga tawo nga mag-hike subay sa V. Rama. May pipila nga makighinabi niya. Tibook tuig, kutob sa moagi sa iyang duol, iya gyung pangayoan og katahuran. “Good morning, sir” kun lalaki. “Good morning, maam” kun babaye.
Dunay lalaki nga sayesyentahon na. Duha ka tuig na nga nag-hike subay sa V. Rama. Duha ka tuig na sang timbaya si Juliana. Duha na ka Disyembre ang nakalabay. Kaduha na sab siya hatagi’g sobre nga may sulod dos siyentos pesos. Pinaskohan.
“Wa baya ko mag-apas og pinaskohan, sir. Mangayo lang gyud ko’g katahuran. May pinaskohan o wa” ni Juliana nga mapahiyomon sa pagkadawat niya sa ikaduhang sobre.
“Giisip na man tikang higala. Busa, dawata lang akong pinobreng regalo” sa hamtong hiker.
Unya takulahaw lang nahingawa si Juliana. Kay duha na ka bulan nga wa na niya hikit-i nga nag-hike ang manggihatagon nga hiker.
Tibook Abril ug Mayo, wa niya hikit-i. Unya karong buntaga, Hunyo 25, hilabihan niyang lipaya nga nagdangadanga ang sir niya. Padulong sa simbahan sa Guadalupe.
“Good morning, sir” ni Juliana. Dako og ngisi. Maayong buntag sab, Juliana” sa hiker. “Diin man diay ka magbakasyon, sir?” ni Juliana.
“Sa Abril ug Mayo nga way klase, didto ko’s Ayala nag-hike. Karon nga tingklase na, balik sa karaang rota. Kadaghan na ko niagi dinhi, apan ikaw ang wa dinhi” sa hiker.
“Mopalta man sab ko usahay sir. Pero nalipay ko nga OK ra diay ka. Wa masakit. Kay kun di ko kakita nimong nag-hike kuyawan ko’g nasakit ka” ni Juliana.
“Simbako, lang. Maong maningkamot gyud ko’g hike aron di masakit” sa hiker. Nagpahiyom sab nga nipadayon og lakaw. Gisundan og tan-aw ni Juliana nga nahimoot nga piskay diay iyang sir. (Katapusan)
- Latest
