Isla Paraiso - Gula 238

Adlaw’ng Biyernes. Nianang pagkahapon, si sister Veronica nahiabot sa pinuy-anan ni Corporal David Benturada. Nakugang kaayo ang korporal sa kalit nga paghitungha sa madre sa iyang pinuy-anan. Nahibulong siya kun giunsa pagtultol sa madre ang iyang gipuy-an. Diha siya sa tugkaran sa balay sa pag-abot ni sister Veronica.

Giabi-abi ni Corporal Benturada si sister Veronica. Gidapit niya kini pagsulod sa balay. Sa sopa nga nahimutang sa sala, gitanyagan niya’g lingkoranan ang madre.

“Didto ko sa presinto kaganina,” ni sister Veronica pa, “apan wala ka man diay moreport karon sa trabaho.”

“Naudtohan ko’g  mata kaganina, sister,” pamahayag ni Corporal Benturada,” mao nga wala na lang ko moreport. Nag-sick leave ko. Nasobrahan tingali ko sa nainom kagahapon.”

“Hain man ang imong  asawa?” Miliraw ang mga mata ni sister Veronica sa palibot sa sala. Nakita niya ang telebisyon nga gipatong sa gamay’ng lamesita, stereo component ug uban pang  kahimanan sa panimalay. Apan wala siya’y laing tawo nga nakitang nagtikawtikaw sa sulod sa balay.

“Ulitawo pa intawon ko, sister,” mora’g napihaw ang nawong sa korporal.

“Aw, unsa gud diay...” ang nasulti sa madre.  - (Sumpayan pa)