Nakalusot ang daginutong kahayag sa bulan sa mga bentanang binuksan sa nahisgotang two-storey warehouse.
Sa dihang nahanaw na sa panan-aw ni Rey si Corporal Benturada nga mipadayon sa unahan, milihok usab siya sa tumang kamainampingon. Mihinay siya pagtindog ug midangop sa sementong bungbong. Namidpid siya sa bungbong samtang padayon nga naglakaw nga giigmat ang mga mata. Wala molugak ang kahugot sa paggunit niya sa iyang Uzi.
Igo lang nakahimo og pipila ka lakang si Rey, may takandal siyang nabati. Naggikan ang diyotay’ng kasikas sa usa ka kahon nga nagbuntaog dili halayo sa iyang nahimutangan. Miipli si Rey sa haliging semento nga maoy labing duol kaniya. Gipaabot niya nga may tawo nga moguho gikan sa luyo sa maong kahon. Taudtaod siya sa maong kahimtang apan wala gayo’y bayhon sa usa ka tawo nga iyang nakita nga migawas gikan sa luyo sa maong kahon.
Napaak ni Rey ang iyang mga ngabil samtang ang mga mata wala ibulag sa kahon. Naghunahuna siya’g maayong buhaton. Hugot ang iyang pagtuo nga tawo gayod ang nagmugna niadtong takandal nga iyang nabati dili pa lang dugay ug kinahanglan nga makakita siya’g paagi nga makuha niya ang pagtagad sa maong kaaway.
Misantop sa iyang hunahuna nga mogawas siya sa iyang gipasalipdang haligi ug padul-an niya ang dakong kahon. -- Sumpayan pa