Milagrong dala sa ulan
Domingo. Alas diyes sa buntag. Wa pa gyud nahurot ang mga baligyang mantalaan ni Lorenzo, diyes anyos. Dili man god siya makapaninda og tarong tungod sa ulan. Nagbarog na lang siya kilid sa panaderya nga nahimutang sa eskina sa mga dalang Cortes ug Fortuna, sa Banilad, dakbayan sa Mandaue.
Dili man kaayo kusog ang ulan. Maguwang lang sa taligsik. Apan igo sang makalanay sa mga mantalaan niyang baligya kun di niya puston og plastic. Duna gyud hinoon siya’y andam nga plastic para sa ulan. Gitugnaw sab siyang nagkugos sa mga mantalaan tungod sa hanging habagat nga kanunay’ng mohuros. Nagpanglantaw na lang siya sa mga sakyanang mohunong ug molarga agad sa suga sa trapiko.
Minghoy ug subo iyang nawong. Kay nawad-an na siya’g paglaum nga mahurot niya’g baligya ang trayenta ka buok Freeman ug trayenta ka buok Banat News. Ulan man gyuy kasagarang makadaut sa hapit tanang matang sa negosyo. Kay ang mga customer mahadlok man mabasa sa ulan. Busa, dili na lang modayon og pamalit. Hilom siyang nag-ampo nga unta mohunong ang ulan.
Ang nakadugang sa iyang kadismayo ang kahimtang sa iyang Mama Delia nga gihutoy pag-ayo ug gihilantan. Wa kapanawat og labada. Gibiyaan lang niya nga mao rang usa nga nagpilit sa banig sulod sa ilang barongbarong sa ekswater erya. Iyang gisaaran iyang mama nga palitan og tambal kun mahalin tanan iyang mga mantalaan. Makaganansiya man siya’g P300 kun mahalin tanan.
“Senyor Santo Niño, tabangi ko nga mahalin tanan nakong mantalaan†ni Lorenzo dalang hapuhap sa imahe sa Senyor ibabaw sa gamay nilang altar sa barongbarong, pagdayong kanaug niya ganihang sayong buntag.
Sila rang duha iya mama sa barongbarong. Kay napaangkan iyang mama. Unya wa kaila ni kakita si Lorenzo sa iyang amahan nga kun mangutana siya’s iyang mama, moingon lang patay na iyang amahan.
Nikusog man hinoon pag-ayo ang ulan. Unya gilunopan na ang karsada. Dunay multicab nga owner type ang namatyan og makina tunga sa karsada.
“Dong, palihug ko’g tulod, Dong†sampit sa drayber nga lalaking mestisohon.
Gibutang ni Lorenzo ang mga mantalaan ibabaw sa gutter nga wa pa nasanapi og tubig. Gidali niya’g tulod ang multicab padulong sa daplin.
“Salamat, Dong ha. Diay usa ka gatos, suhol nako nimo†sa drayber.
Gidawat ni Lorenzo.
“Salamat†niya pa.
“Unsa man diay imong baligya?†sa drayber.
“Mantalaan, sir†ni Lorenzo.
“Pila man to tanan? Kay akong paliton tanan†sa drayber.
“P500, sir†ni Lorenzo. Gihatagan dayon siya’g P500 sa tawo. Gidali ni Lorenzo’g kuha ang mga mantalaan, ug gitunol sa drayber. Hilabihang lipaya sa bata.
“Unsaon man nimo, sir?†ni Lorenzo. Nakuryoso.
“Duna man ko’y magazine stand sa Colon. Mantalaan na lay kulang,†sa drayber.
Nagsagod ang singot ug ulan sa agtang ni Lorenzo. Nihangad siya sa langit nga naglugitom.
“Salamat, Senyor Santo Niño†tuaw niya sa hilom. Iyang luha sa kalipay nisagul sa ulan. Makapalit na gyud siya’g tambal sa iyang masakitong inahan. Usa ka milagrong dala sa ulan. (Katapusan)
- Latest
- Trending
