^

Banat Kalingawan

Yolanda

Sugilanon - Romeo T. Limpangog - The Philippine Star

Ang kabugnaw sa huyohoy sa sayong kabuntagon nga mosapigad sa panit nga tabonon ni Ador wala kini makababag sa iyang tinguha nga masusi ang gitikad niyang halapad nga umahan ug basakan sa sitio Lampirong sa barangay Bugaong nga nahimutang sa bukirang bahin sa lungsod sa Butanding.

Ang dapit nga nakahatag kaniya og  kadasig sa malaay nga mga adlaw sukad sa pagbiya kaniya sa babaye nga natingban sa iyang pagmahal ug pagpangga apan tungod sa naghingapin nga  tinguha sa pagbugtaw sa gipangapkap nga maayong kapalaran daw wala gayod kini batia bisan gamay na lamang kawili sa pagbiya.

“Gikasubo ko Ador,” ni Yolanda pa usa ka gabii niana sa ilang panagkita. “Bisan sakit alang kanako ang pagbiya apan wala akoy mahimo. “Bililhon alang kanako ang nagpaabot kanakong maayong kapalaran sa siyudad nga dili ko makaplagan nga magpabilin dinhi sa bukid.”

Gidugangan pa ang gibating kasakit ni Ador sa pagbiya ni Yolanda kaniya dihang nasinati sa ilang dapit ang naghagiyos nga bagyo nga mikusokuso nga nagbilin og dakong kadaut sa gitikad niyang kamaisan ug  ang kahumayan    sa iyang basakan nahapay dili na gayod kapuslan.

Nakabsan na og paglaum si Ador. Daw midat-ug kang Ador ang nahugno nga kalibutan sa 7.2 magnitude nga linog.  Nagduhiraw ang iyang hunahuna ug wala na masayod sa iyang pagabuhaton.

“Nahanaw na ang tanan kanako,” nagkanayon ang hunahuna ni Ador nga naglingkod sa nag-igdal nga dakong bato ubos sa landong sa dakong kahoy samtang nagpaantaw sa pagsud-ong sa napayhag niyang pananom sa gitikad niyang umahan. “Dili pa igo nga nahanaw kanako si Yolanda, gikusokuso pa gayod sa bagyo ang  akong kamaisan ug kahumayan nga maoy bugtong kong panginabuhian.”

“Ador,” tingog sa usa ka babaye nga nagsampit kaniya gikan sa iyang luyo. “Barog  sa imong gilingkoran,   Ador!”

Milingi si Ador sa iyang luyo ug maoy misugat sa iyang panan-aw si Yolanda. Nagpahiyom kining  miduol sa iyang gilingkoran ug gigunitan  iyang tuong kamot sa pagpabarog gikan sa iyang gilingkoran.

“Barog, Ador,” ni Yolanda pa. “Tungod sa bagyo wala ako mahinayon sa akong paglarga. Ug salamat sa bagyo kay mao man kini ang nakaingon nga nabug-os ang akong hukom sa dili lamang gayod pagbiya.

Wala makatingog si Ador nga migakos kang Yolanda. Gibati niya ang hilabihan nga kahinangop ug  gibalikan na iyang kadasig sa pagpabarog og balik sa nahunlak niyang panginabuhi. (Katapusan)

vuukle comment

ADOR

BAROG

BILILHON

BISAN

BUGAONG

IYANG

YOLANDA

  • Latest
  • Trending
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

Get Updated:

Signup for the News Round now

FORGOT PASSWORD?
SIGN IN
or sign in with