Tinuod nga diwa sa Pasko

Alang sa kadaghanan, naandan na nga makuha ang kalipay panahon sa Pasko sa mga butang nga lumalabay. Tradisyon na kini sa mentalidad sa kadaghanan. Magbayloay og mga regalo. Ang mga balay butangan og Christmas decors. Magsauysaoy ang manaygonay. Maghudyaka sa imnanan. Mag-andam og lamiang mga pagkaon.

Ingon niini ang pagsaulog sa Pasko sa kadaghanan. Nakalimtan ang tinuod nga kahulogan sa Pasko. Hawanan ang dalan sa pag-abot sa Anak sa Diyos. Kini ang gipasabot sa Pasko. Unsang dalana ang hawanan. Ang uban wala makasabot niini. Apan ang tinuod, ang atong kasingkasing maoy atong hawanan sa pag-abot ni Jesus, ang Mesiyas.

Hawanan nato ang atong kasingkasing sa mga sala, sama sa pagdumot, kasilag, kamasinahon, kamahimantayon ug uban pang kinaiya nga iya sa yawa. Ang tinuod nga Diwa sa Pasko mao ang presensiya sa Diyos sa atong kasingkasing.

Ang Diyos maoy naghatag og tinuod nga kalipay ug tinuod nga kalinaw sa kalibotan. Apan gubot ang kalibotan karon kay ang kadaghanan nagpakabuhi sa kahakog ug sa mga lumalabay nga mga butang ug kalipay. Puno sa pagpakaaron-ingnon ang kasingkasing sa kadaghanan. Tan-awa ra gud sa nahitabong kalamidad sa Bohol ug ubang dapit sa Visayas, ang mga hinabang alang sa mga biktima gitikas pa ug gipamolitika.

Pastilan ning mga tawo nga wala’y konsensiya. Nagpasulabi ang pagkatawhanon. Kun ang pagkatawhanon  ang hatagan og dakong pagtagad, mawala  ang presensiya sa Diyos sa atong kasingkasing. Ang espirituhanong katuyoan sa Pasko mawala sa atong kaugalingon.

Ang matag sumad sa pagkatawo ni Jesus, ang Mesiyas nga nagtubos sa kasal-anan sa kalibotan ug sa mga tawo, wala magpasabot nga igo lang kitang maghandom niini sa uphag nga pagbati. Itisok sa kanunay sa atong kasingkasing nga sa matag pag-abot sa Pasko anaa ang kahigayonan nga limpiyohan nato ang atong kaugalingon sa mga sala.

Ang tinuod nga Diwa sa Pasko mao ang pagpasulod kanunay sa Batang Mesiyas sa atong kasingkasing sa tibuok nga kinabuhi.