Atik ni Tirso

Uy, Tirso kabag-o gud sa sakyanan nimo. Asensado na siguro ta ron, timbaya pa ni Lukring usa ka hapon niana sa kanhi klasmet niya sa elementarya sa ilang baryo. Kauban niya sa klase kaniadto si Tirso apan wala siya’y gana ug lud-on kanunay siya kaniya kay wala’y ligo ug wala’y sipilyo ang ngipon niini. Hitsuraan “si Lukring kay kandiison man ug puti ug hamis iyang pamanit. Dose anyos na ang nakalabay. Mitubag si Tirso, Ada, mantinil lang mentras tanto.”

“Asa man diay ka ron magtrabaho og pila nay liwat nimo?” pangutana ni Lukring.

“Nagnegosyo lang ko wala ko manarbaho og kompaniya. Maayo gyud nang kita’y tag-iya sa oras,” tubag ni Tirso.

“Unya, minyo na ka ron?”, ni Lukring.

“Single pa ko ron kay nagpaabot gyud ko nimo,” palabtik pa ni Tirso.

“Kun mao na, pareho diay ta ani, single pa man sab ko,” ni Lukring.

“He-he.., tayming diay ning pagkaulia ko ron kay gawasnon ka pa man sab diay Lukring, tingali kita gyud ang gitadhana para sa usa’g-usa,” ni Tirso nga mingisi samtang mitutok kang Lukring.

“Saba ka diha Tirso uy,! maganahan man sab ta nimo’g dali!”, ni Lukring nga mipahiyom.

“Dili na lang ko magdugay...adto pa ba gihapon inyong balay sa baryo Tubaan?, kay mamisita unya ko nimo,” ni Tirso nga miabli na sa pultahan sa iyang awto.

“Aw o uy, kami na lang si Nanay Toyang kay patay na man si Tatay Tolin nahulog sa pagpananggot,” ni Lukring.

“Mao ba, sige mobisita lang unya ko didto,” ni Tirso ug dayong pabulhot sa sinaw niyang awto nga Strada.

Tuod man, namisita gyud si Tirso usa ka Domingo niana sa ilang Lukring dala ang sakyanan. Proud ug mapagarbuhon kaayo si Lukring   kang Tirso kay de-sakyanan man. Pilay estorya, nakasal sila sa huwes sa lungsod. Dangtag pipila ka bulan sa ilang panagtipon nangutana si Lukring sa iyang bana nga si Tirso,” Dong Tirso, asa na man diay ang sinaw ug bag-o mong sakyanan?, wala na lagi nimo giparada dinhi sa among balay human sa atong kasal?..., hain na man diay dong Tirso?”, sunod-sunod nga pangutana ni Lukring.

Daw gipaningot og bugbog si Tirso niadtong tungora ug...nagkanayon...

“Ku...kuk...ku...an, hehe..., day Lukring, kining sultian ta na lang ka sa tinuod..., usa lang ako ka family driver!”, ni Tirso nga nagpangutkot sa iyang ulo.

“Unsa?”, imo lang diay kong giatik Tirsoha ka! banghag ni Lukring.

“Ki...kining kuan day, giatik lang tika para mosugot ka nako kay sa kaniadto pa nahigugma na ko nimong daan,” pamahayag ni Tirso.

Nakapaminaw diay si Nang Toyang sa pikas kuwarto ug nagkanayon. “Ay da, maayo na lang na si Tirso kay naa man gyuy suweldo hilasbi sa uban nga wa jud. Ayaw na lang ug suko-suko og sige’g panghupaw diha Lukring kay gusto na kong motan-aw ug mokugos sa akong apo!” (Kataposan)