Nasuko na ang katawhan

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Gipakita sa katawhang Pilipino ang ilang kasuko sa grabeng pangawkaw sa ubang mga opisyal sa gobiyerno. Ang dakong protesta dili pa lang dugay sa Manila, Cebu ug ubang dapit sa nasud maoy timailhan nga gipakita na sa katawhan nga angayan gayud nga sumpuon ang korupsyon nga gihimo nang tradisyon sa ubang mga senador ug kongresista. Dili lamang dinhi sa nasud ang gihimong protesta kun dili hangtod na usab sa ubang nasud, nagkauyon ang mga Pilipino didto nga mipakita sa dako nilang kasagmuyo ug pagsupak sa pagpangawat sa kuwarta sa nasud.

Tinuod nga hugtanong gisumpo sa administrasyon karon kining nagpadayong mangil-ad nga binuhatan sa ubang mga opisyal sa kagamhanan. Apan nagpabaga gihapon sa nawong ang mga kawatan sa gobiyerno. Wala sila mahadlok sa pagpadayon sa pagpangawat sa salapi sa lungsod. Nagpabusdik sila sa ilang bulsa samtang ang kinabag-ang Pilipino nag-antos sa kalisod sa pagpuyo.

Si kanhi Senador Panfilo Lacson nagpahayag nga kinahanglang hatagan og hustong leksyon ang mga kawatan sa gobiyerno ilabi na ang mga senador ug mga kongresista pinaagi sa pagtinuod gayud sa pag-imbestigar kanila. Ug kun mamatud-an sila nga sad-an, dul-itan gayud sila og warrant of arrest aron mahigmata sa dako nilang kasal-anan sa katawhang Pilipino.

Nakita ni Presidente Noynoy nga kusganon nang nanginlabot ang mga tawo sa dakong eskandalo nga nahitabo sa pork barrel. Misinta na ang katawhang Pilipino ug gusto nilang patubagon ug silotan gayud ang mga tikasan ug kawatan sa gobiyerno. Ilang gipakita nga ang kuwarta sa kagamhanan naggikan kanila, nga gikan sa buhis sa katawhan.

Angay na usab hunongon ni Noynoy ang iyang pagpasigarbo nga ang pagpangawat sa ubang opisyal sa gobiyerno nahitabo lang sa milabay nga administrasyon. Dakong sagpa sa gobiyerno karon ang reyalidad nga hangtod karon hiwi pa gihapon ang dalan nga gisubay sa kagamhanan. Ang gipangandoy nga tul-id nga dalan gikataw-an lamang sa mga buaya sa gobiyerno nga dili ma-ulaw nga nagpahimulos sa kuwarta sa lungsod.