DNA

Kun nagsulti kas tinuod nga dili ikaw ang naglugos sa biktima, mamatud-an ni pinaagi sa imong DNA” ni Atty. Nebria ngadto sa iyang kliyente nga si Andy. Nia sila naghinabi ning sayong kahaponon sulod sa conference room sa detention Center sa lungsod sa Ramodo. Napasanginlan si Andy nga maoy naglugos ni Zolena.

Silingan man god sila’g lawak sa boarding house duol sa ilang eskuylahan. Puro sila estudyante sa kolehiyo. Ang paglugos nahitabo sa adlaw’ng Domingo. Wa nisuroy si Andy adtong adlawa tungod sa hang-over sa pakig-inom niya sa mga barkada sa nilabay’ng gabii. Kay way laing lalaki sa boarding house atol sa nahitabo, si Andy gyud ang napasanginlan.

Wa man kakita si Zolena sa hitsura sa manglulugos. Kay nagmaskara man. Unya may gitabon sa iyang nawong sa wa pa siya nawad-i’g panimuot. Way panimuot si Zolena dihang gilugos. Napasanginlan si Andy kay nangulitawo sa dalaga unya wa sugta. Dayon nagbahad og dautan batok sa dalaga. “Unsa man nang DNA, Attorney?” ni Andy. Nag-untol-untol iyang toong tikod sa sawog samtang naglingkod. Gipasabot dayon sa abogado iyang kliyente.

Ang DNA minubo sa pulong Deoxryribonucleic Acid. Usa ni ka matang sa asido nga naa sa tawo. Makuha ni gikan sa hapit tanang tipik sa lawas sa tawo. Sama sa buhok, balhibo, panit, unod, koko, kubal, kugan, ngipon, bukog, muta ug kugmo. Naa ni sa tanang likido sa lawas sama sa dugo, nana, singot, luha, laway, sip-on, plema, ihi, binhi (sperm cell) ug hugaw. Ang DNA sama sa fingerprint, unique sa tawo. Way duha ka tawo nga pareha og fingerprint. Wa say duha ka tawo nga pareha og DNA. “Unsa may gamit sa DNA sa akong kaso?” ni Andy.

“Sa na-recover nga sperm cell gikan sa kinatawo sa biktima, nakuhaan og DNA. Busa, nakahunahuna ko nga kuhaan la’g DNA aron ikomparar sa DNA sa naglugos ni Zolena” sa abogado,. Seryoso nga nagtutok sa kliyente. Naniid sa reaksiyon sa suspek. “Sa ato pa, kun lahi ang DNA sa naglugos, dili pareha sa ako, mamatud-an nga dili ako ang naglugos?” ni Andy. Daw nagluya nga tuas layo ang panglantaw. “Mao nay akong gustong mapamatud-an. Pero seguradoha nga pabor gyud nimo ang resulta. Kay kun dili, di na lang ta mag-usik sa gasto. Tungod sa kapobre sa imong ginikanan, wa gyud sila kapiyansa nimo. Pero ako silang gipahunat kun desidido ba sila mogasto sa pagkuha nimo’g DNA. Mahal man kaayo nig bayranan nga proseso” sa abogado. Gitukod ang walang siko sa lamesa.

“Inosente ko, attorney. Kun DNA maoy makaprobar ini, mosugot ko nga kuhaan og DNA” ni Andy. Nihayag ang nawong. Nisidlak ang tinan-awan. “O sigi. Ugma dayon moari si Dr. Frank World aron kuhaan ka’g sampol sa imong dugo” sa abogado. “Ingna lang sila’s papa’g mama nga kun sex lang akong gusto, mangabang ko. Di ko kahimo anang mang-rape oy! Pero, naa sab gyuy lalaki nga gusto ana!” ni Andy. “Unya nganong gibaharan man nimong lugoson si Zolena?” sa abogado. Nisigang mata ngadto sa kliyente. “Sa ako lang tong kahiubos ug kalagot. Nangulitawo ko’g tinarong. Balibaran sab unta ko’g tinarong. Dili pakapinan og insulto ug biaybiay. Natural lang nang makasulti tag ngil-ad usahay. Apan kun gusto gyud kong mobuhat og dautan, di ko mosulti daan. Makabantay na hinoon ang biktima” ni Andy.

“Nahala. Masuta ra unya nato kun nagsulti ka bas tinood. Adto na ko,” sa abogado. Nitindog. Nilakang padulong sa pultahan. Gisundan og tan-aw ni Andy ang abogado. Naghulat pa siya’s correctional guard nga mokuyog niya balik sa iyang selda. (Kataposan) (Sa gusto’g libreng kunsulta, dad-a ning pahina sa sugilanon sa opisina sa tagsulat, sa Sabado’s buntag).