Gugmang matuod

Gula 5

Upat ra ka paresan ang miapil sa dance contest ug katapusan nga mosayaw sila si Raffy ug Melody. Nagtupad sila si Raffy ug Melody nga nagtindog daplin sa gamay’ng hawan ug giayo’g tan-aw ang steppings sa ilang mga kontra.

Ang gikataw-an sa mga nanan-aw mao ang duha ka lalaki nga nagbalitok-balitok sa ilang pagsayaw nga sagad nato makita diha sa mga TV show. “Duna ‘sab diay makamao nianang sayawa dinhi Mel?” matud ni Raffy.

“Kanang lalaki nga nagbalitok-balitok nakatrabaho na og siyudad ug pagbalik dinhi hambugero na kaayo kay taga siyudad na kuno siya,” tubag ni Melody.

Hangtud nga miabot na gayud ang higayon nga sila na si Raffy ug Melody ang manayaw. Pagsulod pa lang ni Raffy sa hawan nga gialirongan sa mga nanan-aw, mipakpak ang mga tawo bisan og wala pa gani makakita sa ilang sayaw.

Gipasiplatan ni Raffy ang mga tawo ug iyang nabasa sa ilang mga panagway nga nagtuo sila nga nindot ang ilang pasundayag. Tuod, misugod na sa pagtugtog ang Night Fever. Sanglit karaan na man ang maong tukar, nakasinati kaayo niini ang kadaghanan sa mga tawo.

Bisan og batan-on pa si Raffy apan maantigo siya sa mga steppings sa Night Fever nga gipasikat ni John Travolta kaniadto. Nakakita si Raffy sa mga steppings sa Night Fever gikan sa You Tube.

Miarte gayud pag-ayo si Raffy. Gipakagiw ni Raffy sa iyang kaugalingon ang kauwaw aron nga malingaw niya ang mga nanan-aw. Ang mga steppings ni Raffy gisundog usab ni Melody.

Samtang sila nagsayaw, nagbayloay og mga pahiyom sila si Raffy ug Melody nga maoy nakapasamot kanindot nila tan-awon.

“Bilib ko nimo Raff uy, maayo ka g’yud mosayaw,” giingnan ni Melody si Raffy. Nahimong sikat si Raffy bisan og karon pa siyang gabhiona miabut ning lugara.

Tuod, sila si Raffy ug Melody maoy giila nga “best dancer” ug gipilde nila ang tulo ka laing paresan. Pwerteng lipaya ni Melody nga gihatag ra ni Raffy kaniya ang P500 nila nga daug sa dance contest. Nagbuwag-buwag ang mga tawo sa pagpauli human sa contest.

Nagkuyog usab sila si nang Ason, Isko, Lester ug Raffy pagpauli. Alang kang Raffy, nindot kaayo ang kalamboan sa unang adlaw sa iyang pag-adventure. Nakatulog pag-ayo si Raffy ug buntag na siya nga nakamata.

Nakamatngon si Raffy nga adunay laing babaye nga gika-estorya si nang Ason didto sa kusina. Mora’g kabisado si Raffy sa tingog sa babaye   si Melody. (Sumpayan)