Gugmang matuod

Gula 3

Taud-taud, gisugdan ang kalingawan sa hawan nga bahin kilid sa kapilya. Mitugtog na usab ang amplifier ug nadungog nila ang emcee nga nag-awhag na og mga tawo nga moapil sa amateur hour.

“Apil bai sa amateur hour,” giingnan si Raffy sa iyang higala nga si Lester. Mipahiyom si Raffy kay ang tinuod maantigo siya nga mokanta. Gipahibalo sa emcee nga lima na ang nagpalista nga moapil sa amateur hour.

Nagsingabut sa ilang nahimutangan si Nang Ason nga nagkaang-kaang sa paglakaw ug gisugat kini sa iyang bana. Miduol si nang Ason kanila ni Lester ug Raffy.

“Dunay kontis sa kanta dong, apil para malingaw ang mga tawo nga dunay dili taga dinhi nga mosalmot,” matud ni nang Ason. Naghuna-huna si Raffy kun unsay iyang kantahon nga mohaum sa bukid. Tuod, kalit misantup sa iyang huna-huna ang kanta ni Eddie Peregrina nga Please Love Me Now. Nasayud si Raffy nga makadapit gayud kini og pagtagad sa mga tawo, ilabi na sa probinsya.

Gisugdan dayon ang kontis sa pagkanta. Kataposan si Raffy nga mokanta. Giduol niya ang naggunit sa song book kay video-karaoke man ang gigamit nila sa kontis. Tuod, wala mosipyat, nakit-an dayon ni Raffy ang Please Love Me Now. Gitiman-an ra ni Raffy ang iyang numero ug gitug-an kini ngadto sa naglingkod sa lamesa.

Didto si Raffy nagpahimutang sa luyo sa mga tawo. Nadungog niya sa kumentaryo sa mga tawo nga wala kaayo sila mahimuot sa unang mga mikanta, ilabi na nga ang uban binag-o ang gikanta.

“Fight g’yud Raff ha? Ayaw palupig kay ako na nga gihunghongan ang tigpaila nga taga siyudad ka,” matud ni Lester ngadto ni Raffy.

Mihugyaw ang mga tawo sa pagkanta na sa ika-unom nga contestant kay mikanta kini og awit ni Victor Wood. Nasayran ni Raffy nga pulos mga joke box king sila si Victor Wood ug Eddie Peregrina kaniadto ug ang ilang mga awit sikat sa bukid.

“Ug karon, ang kataposan nga moawit, usa nato ka bisita nga taga siyudad, kantahon niya ang awit ni Eddie Peregrina nga Please Love Me Now!” singgaak sa emcee.

Mihilom ang mga tawo nga nagpaabut sa pag-awit ni Raffy. Gipatugtog na ang videoke. Pagsugod pa lang sa intru sa kanta nga Please Love Me Now, mipakpak ug misiyagit na ang mga tawo sa kalipay. (Sumpayan)