Kinsa kaha ang Dolphy sa bag-ong panahon

Daghan ang nag-ingon nga ang namatay nga si Dolphy kon Rodulfo Vera Quizon nga giilang hari sa komedya sa pelikulang Pilipinhon mahimo na nga kabahin sa mga artista nga mitaliwan na usab sa kalibotan.

Sa paghingalan sa pipila ka mga artista nga sama kang Dolphy nga gihugopan usab kaniadto ang ilang mga pelikula sa pagtan-aw sa katawhang Pilipinhon mao ang naglakip kanila ni Chequito, Rene Requistas, Fernando Poe Jr. nga giila usab nga action king, Rudy Fernandez ug uban pa.

Sa gihisgotan nga mga pangalan sa mga artisa nga namatay na wala pa gayod kita makakita og mga timailhan sa mga bag-o karon nga artisa nga makasunod sa ilang kalampusan nga naangkon sa natad sa paglingaw sa katawhan pinaagi sa ilang mga pelikula.  

Matud pa nila nga dili gayod ikalimod nga gihugopan sa pagtan-aw ang ilang mga salida sa maong mga nangamatay na nga artista sulod sa daghang katuigan ug nakalingaw kini sa katawhan, sa mga bata, tigulang ug mga hingkod na ang panuigon sa Luzon, Visayas ug Mindanao.

Dugang pa nila nga labing taas pa gayod nga katuigan ang paghatag og kalingawan ni Dolphy sa katawhan sanglit gatusan man ka mga pelikula ang iyang nagama ug pulos kini gihugopan sa pagtan-aw sa iyang mga fans gawas sa mga pasundayag niini sa telebisyon sama sa John en Marsha ug Home Along da Relis.

Nunot sa iyang kamatayon sa 83 anyos nga panuigon ang iyang mga fans sa Kabisayaan ug Mindanao daw wala kaayo mahingangha tungod kay nasayran na man daan nga naghambin kini og bug-at nga balatian ug taudtaud usab kini nga nagpabilin sa sulod sa tambalanan.

Taliwala sa iyang kamatayon ang pipila ka mga tawo nga nagsunod sa pagtan-aw sa iyang mga salida sa pelikula ug mga pasundayag sa telebisyon daw igo na lamang nga nakapangutana sa ilang kaugalingon kinsa kaha sa mga bag-o karon nga artista nga komedyante nga makasunod og susama nga kahimtang sa paglingaw sa katawhan nga pagaisipon nga Dolphy sa bag-ong panahon. (Romeo T. Limpangog)