Gula 144
“Kun duna moy problema, mas maayong magkasulti mo aron mahusay ang tanan. Di maayong imong likayan sa laktod si Erik.”
Apan wala gyud makig-atubang si Angeline kang Erik. Si Vera na lang maoy mi-entertain sa ulitawo didto sa sala sa boarding house.
Ingon sa miislag gayod pag-ayo si Angeline tungod sa gibuhat ni Erik kaniya. Gihigugma niya ang ulitawo sa hilom. Pero dili siya kombinsido nga tinud-anay ang pagpangulitawo niini kaniya. Nagtuo siya nga gusto lang siyang himuong instrumento ni Erik aron makalingkawas kini sa tulobagon niini kang Almina.
Sa ilang tulonghaan, kanunay nangita’g paagi si Angeline nga makalikay siya kang Erik. Sa matag higayon nga mamisita ang ulitawo kaniya sa boarding house nga iyang gipuy-an, dili kini niya atubangon.
“Kun ako pay naa sa imong dapit mas maayo pag pakigsultihan na lang nimo si Erik,” giingnan siya ni Vera usa ka higayon niana. “Prangkahi aron dili na siya magbalikbalik.”
Nasayod na si Vera nga nangulitawo si Erik kang Angeline.
“Bahala siya sa iyang kinabuhi,” nagkanayon si Angeline. -- Sumpayan pa