Gahum sa Kuwarta

Gula 3

“Seafoods lang ta kay puol na kaayo ang karne,” matud ni Loren. Misakay dayon sila’g taksi paingon sa mga seafood restaurant sa Salinas Drive, Lahug. Nagtupad sila paglingkod sa luyo nga lingkoranan.

Nakabantay si Roderick nga si Loren, kinsa wala kaayo motagad kaniya kaganinang hapon sa wala pa siya mopalit og selpon, mora’g gimagnet nga pwerte na nga nakaparayeg-parayeg kaniya.

Gani samtang nagdagan ang taksi paingon sa Salinas Drive, dunay mga higayon nga mogunit si Loren sa bukton ni Roderick. “Wala ka na lang magdala og bag Rod? Basin og nahabilin kadtong imong gidala ganina?” matud ni promo girl.

“Gideposito nako ug nagbilin ra ko og kapin sa seventy thousand kay dili man usab nato kini mahurot,” giingnan ni Roderick ang dalaga. “Ayaw kalimot sa imong tip nako ha?”

Didto sila magpahimutang sa second floor diin minus ra ang mga customer. Sagad didto sa taas mga mag-sweetheart. “Busog g’yud kaayo ko Rod,” ni Loren pa nga mihikap na usab sa bukton ni Roderick.

“Unya, asa man ta karon?” ni Roderick pa nga gipabut-an ra si Loren. “Ihatud na lang ko sa apartment aron makatultol ka sa akong gipuy-an,” matud sa gwapa nga promo.

Nanakay na usab sila’g taksi, apan samtang nagdagan ang taksi paingon sa Mambaling, mibunok ang uwan pag-abot nila sa Fuente Osmeña. “Hala uy, mikalit man lang pag-uwan Rod,” pwerteng nakagunit ni Loren sa wala nga bukton ni Roderick samtang milingi sa nagbunok nga uwan sa gawas.

Taud-taud, miabot sila sa Mambaling. “Diha lang tungod sa apartment Nong,” giingnan ni Loren ang taksi driver. “Dali hapit usa Rod,” gidapit ni Loren si Roderick nga manaug.

Gitunolan ni Roderick og tibuok P500 ang drayber. “Imo na kanang sukli Nong.”

Gigunitan ni Loren ang kamot ni Roderick ug nanglakaw sila subay sa paseyo sa apartment. Gikuot ni Loren ang iyang bag ug mihunong sila tungod sa usa ka pultahan, dayon giyawehan.

“Dali sulod usa Rod.” Gigil-asan si Roderick kay basin unya kun lainon og sabot kun adunay makakita nga misulod siya sa kwarto sa promo. “Nahadlok ka? Ayaw kabalaka uy kay ang uban dinhi magpasulod man usab sa ilang mga boyfriend sa ilang room,” ni Loren pa.

“Mao ba? Aw boyfriend man gud nila ang misulod, maayo unta og imo pa usab ko nga boyfriend kay pwede ra,” abtik nga tubag ni Roderick nga dala’ng komedya.

Mitutok kaniya si Loren. (Sumpayan)