Mata sa Kasingkasing

Gula 119

“Ayaw na lang hunahunaa ang maong babaye, Erik. I-concentrate na lang ang imong hunahuna kang Almina. May dako kanang kaakohan kaniya karon nga nagsabak na siya sa inyong anak. Kinahanglang bangunon mo ang iyang kadungganan nga imong gipukan.”

“Di pa ko andam magminyo. Ug wa koy planong pakaslan si Almina.”

Dihang lawom nang gabii, gipapauli na ni Angeline si Erik. Misulod dayon siya sa iyang lawak dihang nakalakaw na ang ulitawo. Mihigda dayon siya. Pero lapas na sa tungang gabii dihang nakatulog siya.

Sayong nagmata si Angeline nianang pagka-buntag. Naligo siya. Nakaluto na siya sa pamahaw dihang migawas si Vera gikan sa ilang lawak. Nagdungan sila’g kaon.

“Unsa bang orasa mipauli si Erik kagabii?” Nangutana si Vera.

“Hapit na alas dose,” tubag ni Angeline. “Naglagot man gani ko.”

“Pasagdi lang gud na siya, Day. Buotan baya na si Erik.”

Wala na motingog si Angeline. Mipaspas siya’g hungit. Gitibawas nila ang pagpangaon. -- Sumpayan pa