Si Sheila usa sa mga biktima sa bagyong Sendong niadtong hinapos ang bulan sa 2011. Hinuon, dili siya sama sa uban nga halos mawad-an sa kinabuhi. Labaw pa gani ang uban kay daghan kanila ang nangamatay.
Gamay lang ang balay nila ni Shiela. Taod-taod nang mitaliwan ang iyang mga ginikanan ngadto sa pikas nga kalibotan. Siya lang ang nag-alima sa iyang duha ka mga igsuon sukad mawala ang duha ug ang iyang gisaligan para sa ilang pagpakabuhi mao ang gamay’ng yuta silbing kabilin sa ilang papa ug mama.
“Shiela, kun unsay mahitabo kanako, ayaw bayag pasagdi ang imong manghod,” pulong sa iyang Mama. “Sukad mawala si Papa mo mga pipila na ka tuig ang milabay, iyang gibilin kanako kining gamay’ng yuta nga kabilin usab sa imong Lola ug Lolo. Kini nga yuta, taliwala sa iyang pagka gamay, mabuhi na kamo ug ang imong manghod. Sa akong paminaw sa akong lawas, morag dili na ako magdugay.”
Wala na tuod magdugay ang inahan ni Shiela busa si Shiela na lang ug ang iyang igsuon ang nahiblin. Si Shiela taliwala sa iyang kabatan-on, maoy mitikad sa tulo nila ka ektaryang yuta.
Sa milabay’ng tuig, nahitabo ang bagyong Sendong ug maayo nalang kay medyo layo na sa ilang dapit ang sentro sa bagyo. Makalilisang ang nangamatay. Hinuon, maisip gihapon nga biktima sila si Shiela kay gibanlas sa baha ang iyang gamay nga uma, busa usa sila sa gitabangan sa DSWD.
Human sa bagyo nga Sendong, mianha sa ilang balay ang tinugyanan sa City Engineer’s Office ug nakigsabot kaniya nga kuno ang ilang luna sa yuta, tipik niini, butangan sa gobyerno og mga pasilidad sa Weather Bureau.
“Higayon mo na kana, Day Shiela,” pulong sa City Engineer. “Ang yuta abangan sa gobyerno sulod sa 25 ka tuig sa kantidad nga 15 mil ka pesos ang matag bulan.
Nalipay si Sheila sa higayon nga midangat sa iyang kinabuhi kay tungod niini, mahimo na niyang ipatungha ang iyang igsuon sa high school. Gituyo man god sa kadagkoan sa siyudad nga anha sa ilang yuta ibutang ang Weather Bureau Station sanglit kay usa man sila sa mga biktima sa bagyong Sendong busa pinaagi niini, matabangan sila sa gobyerno ug ang pagbutang pasilidades sa Weather Bureau, usa na sa matabang kanila sa gobyerno.
Busa, human sa bagyong Sendong, daghan gayod ang mga tawo nga naglagot tungod sa Sendong. Para kang Shiela, usa siya sa masuwerte kay kong wala pa si Sendong, dili maharuhay ang ilang kinabuhi. Ingon lang gayod niana ang kahigayonan sa kinabuhi. Kun ang uban, gisakit tungod sa mao nga bagyo, lahi si Shiela kay nindot ang gidalit sa iyang kinabuhi. (Kataposan)