Human sa Kalipay

Gula 4

Mikilab lang ang mga adlaw. Miabot ang Domingo nga maoy birthday sa amigo ni Frank diin si Rosita giimbitar nga motambong.

Sabado sa gabii dihang gikuha ni Frank si Rosita didto sa gitrabahoan niya sa SM, gipahinumdoman niya ang dalaga sa ilang pagtambong sa birthday party sa iyang amigo.

“Mag-overnight ang akong mga amigo sa beach, gusto ka ba nga magkuha ta og cottage aron makapahuway ka Rose kun kapuyon ka,” giingnan ni Frank si Rosita. “Ayaw lang uy, kay dili lang ta magdugay didto kay dili gusto si Mama nga magabhian ko," sa dalaga pa.

Human ikahatud ni Frank si Rosita sa ilang balay, mediritso ra siya'g sulod sa iyang kwarto kay gibati na siya'g duka. Nakakaon naman usab sila si Frank didto sa Fuente Osmeña.

Nahuna-huna ni Rosita nga bisan og wala pa sila'y relasyon ug si Frank apan ang ilang pagtinagdanay susama na sa managhinigugmaay.

Samtang nagpiyong ang mga mata ni Rosita nga nagpaabot nga dagiton siya sa katulogon, iyang gihuna-huna kun unsay sunod niya nga lakang kun mahitabo nga manguyab kaniya si Frank.

Nasabtan hinoon niya nga may migitib na nga pagbati nga miturok sa iyang dughan alang kang Frank nga mipakita kaniya og kabuotan. “Salamat nga gidawat nimo ang akong gugma Rose,” matud ni Frank.

Kalit nga nahigmata sa iyang katulogon si Rosita tungod kay pwerte niya nga nakalimbag-limbag aron santaon si Frank nga buot na unta nga mohiram sa labing pribado nga parte sa iyang lawas.

Nagkuba-kuba ang dughan ni Rosita nga mibangon sa iyang gihigdaan. “Nagdamgo ra man diay ko. Unsa kaha’y buot ipasabot niadto?” nakapangutana si Rosita sa iyang kaugalingon.

Gikan niadto wala na’y maayo nga kinatulgan si Rosita. Wala gayud mahanaw sa iyang huna-huna ang iyang damgo. Pagka-ugma, ang damgo ni Rosita mipasunding gihapon kini sa iyang kaisipan.

Human siya makapaniudto, naghinuktok si Rosita nga nagpahayahay sa lantay nga nahimutang ilawom sa kahoy'ng mansanitas atubangan sa ilang balay. “Rose, andam ka na?” nahaigking si Rosita nga wala magdahum nga diha na diay sa iyang luyo si Frank.

“Wala ka makabantay sa akong pag-abot kay wala ko karon nag-motor. Awto ang akong gidala para dili ta maglisud kun duna kay mga dad-on nga extra nga sinena. Gawas pa sa Toledo ang beach party nga atong tambongan,” giingnan ni Frank si Rose. - (Sumpayan)