Man Hater

Gula 82

Kinsa kaha kadtong tarantadong dako nga dili man motubag! Nagbagulbol si Yuri sa hilom samtang gitutokan ang awditibo sa telepono nga bag-o lang niyang gibutang. Misantop sa iyang hunahuna nga may nagbinuang kaniya. Makadaghan na siya mabiktima sa mga tawo nga kun wala’y laing mahimo maoy kalingawan ang telepono.

Samtang padayon nga gitutokan ni Yuri ang awditibo, dihay kalit nga misulod sa iyang hunahuna. Nahinumdom siya kang Salie. Kalit siyang gimingaw sa dalaga.

Dihadiha gikawhat niya ang awditibo ug gidayal ang numero sa MoonStar Daily. Kinahanglan ikasulti niya si Salie karon iyawat na lang nga matibhangan ang kamingaw nga iyang gibati ngadto sa dalaga.

Mikuba ang dughan ni Chief Inspector Yuri Cuyos. Hugot niyang gigunitan ang awditibo. Nabati niya nga nagkalingaw og bagting didto sa pikas tumoy. Gipaabot niya nga puniton kini.

Naseguro niya nga masuko si Salie niining iyang pagtawag karon. Apan namahala siya. Masuko na kun masuko, matud niya sa kaugalingon, basta gusto gayod niyang ikasulti ang dalaga aron ikapahungaw niya ang iyang mga kamingaw.

May mipunit na sa pikas tumoy sa telepono. Tingog sa usa ka babaye ang iyang nabati. Apan dili kini tingog ni Salie. Bisan og wala pa niya madungog sukad masukad ang tingog sa dalaga sa telepono apan naseguro niya nga dili kang Salie ang tingog nga iyang nadungog.

“Good morning,” nangatahoran siya. “May I speak to Miss Salie Valle?”

“Just a minute, Sir,” matud sa babaye didto sa pikas linya.

Samtang nagpaabot siya sa pagtubag ni Salie, namatikdan niya nga misamot kakusog ang pagkuba sa iyang dughan. Nakasukot siya sa iyang kaugalingon kun unsay maayong approach sa dalaga aron dili kini masuko kaniya.

Taudtaod nabati niya ang tingog ni Salie. -- Sumpayan pa