Man Hater

Gula 81

Wala siya magpasabot nga mibati siya’g kasubo. Gipugos niya sa pagsayag ang iyang panagway aron dili mahibulong kaniya ang iyang mga ginikanan ug igsuon.

“Sagdi lang, Pa, Ma,” niya pa. “Maminyo ra lagi ko inig-abot sa hustong panahon.”

Ug gitibawas nila ang pangaon.

Human makakaon sa ilang pamahaw, misakay gilayon sila si Yuri ug Rose sa service jeep sa nahauna. Nabatasan ni Yuri ang paghatod sa manghod sa tunghaan niini. Iya una kining ihapit sa tunghaan sa dili pa siya molahos ngadto sa buhatan sa kapolisan.

Didto sa kuwerpo sa kapolisan libang kaayo si Yuri sa pagbasa sa mga folder nga nagtipun-og sa ibabaw sa iyang lamesa nga bag-o lang niyang gipagawas gikan sa steel cabinet. Mga kaso kini nga gisang-at sa iyang lamesa aron kahatagan og aksiyon.

Gipangita ni Yuri ang folder nga nahimutangan sa mahinungdanong mga impormasyon mahitungod sa kaso sa kamatayon ni Debbie Balatan. Mao kini ang gusto niyang tun-an karon. Mamasin siya nga makakita na siya’g anggulo nga sarang makagahas og dalan sa pagsulbad sa maong krimen.

Napahunong si Yuri sa pagpakli sa mga folder sa dihang mibagting ang telepono nga diha sa ibabaw sa iyang talad. Sa ikatulong pagbagting sa telepono, gipunit na ni Yuri ang awditibo.

“Hello?” niya pa.

Wala’y tubag.

“Hello?” ni Yuri na usab.

Wala gihapoy mitubag. Hinuon nabati ni Yuri pagkataudtaod nga miklik ang pikas linya, timaan nga gibutang sa nanawag ang awditibo niini.

Napusdak ni Yuri ang awditibo nga iyang gigunitan. Mibati siya’g kalagot sa caller nga wala motingog sa dihang iya kining gitubag. -- Sumpayan pa