Man Hater

Gula 76

Buot siyang mobalik ngadto sa kuwarto aron pagkuha sa iyang armas apan may kawili nga mihawid kaniya. Nabalaka ang iyang hunahuna nga tingalig dili na hinuon niya makita ang kahibulongang anino kun iya kining bulagan sa iyang panan-aw Busa nagpabilin na lang gayod siya sa may bentana ug gipanid-an kun unsay sunod nga buhaton sa tawo nga naghupohupo sa mga tanom sa ilang nataran.

Misantop sa hunahuna ni Yuri nga usa ka kawatan ang maong tawo. Buot kining mangawat sa sulod sa ilang balay. Kun mao, si Yuri pa sa iyang kaugalingon, paaboton na lang niya nga mosulod ang tawo sa balay. Siya nay bahala kun unsay iyang buhaton niini kun mosulod man gayod kini sa ilang balay niining orasa sa kagabhion.

Naghulat si Yuri kun unsay sunod nga buhaton sa tawo. Wala niya ibulag ang iyang panan-aw didto sa nahimutangan niini sa labong nga mga tanom.

Unya misamot pagpanglimbawot ang mga balhibo ni Yuri sa dihang iyang nakita nga migawas ang misteryosong tawo gikan sa gitagoan niini.

Wala maglihok si Chief Inspector Yuri Cuyos nga nagtindog duol sa bentana. Ang iyang mga mata didto ra sa misteryosong tawo nga iyang nakita sa ilang nataran. Wala gayod niya maklaro ang panagway niini. Gipaabot niya nga mabantang ang nawong niini sa suga sa poste sa unahan sa ilang balay apan wala gayod kini moatubang didto aron unta iya kining mailhan. Gipanid-an na lang niya ang mga lihok niini.

Ang tawo mianam sa pagpalayo. Unya nakita ni Yuri nga mikatkat kini sa koral ug miambak ngadto sa gawas. Wala na makita ni Yuri ang bayhon sa maong lalaki.

Milabok karon sa kaisipan ni Yuri ang tumang kalibog mahitungod niadtong tawo nga iyang nakita, kinsa man kadtong maong tawo? Unsa may tuyo niini nga misulod man gayod kini sa ilang lagwerta? Mga pangutana kini nga gisukot ni Yuri sa iyang kaugalingon. -- Sumpayan pa