Man Hater

Gula 64

Ikaw man gani ang nakabangal sa patay’ng lawas ni Debbie Balatan -- kamong duha si Allan -- didto sa bakanteng lote. Gawas pa, Toyota Corolla kining imong awto. Ang gisakyan sa mamumuno usa ka Nissan Altima.”

Nahilom si Salie.

“I’m sorry nga nalakbitan ko ang taga press,” matud ni Yuri pagkilab sa usa ka daklit. “Tingali’g nahimangod ka.”

“No. I-it’s okey,” ni Salie pa.

“Ug ania pa gayod, Salie,” ni Yuri.

“Unsa kana?” ni Salie.

“Lagmit nga adunay kalambigitan ang trabaho ni Debbie Balatan sa iyang kamatayon.”

Mikunot ang agtang ni Salie.

“Debbie Balatan is a prostitute, you know,” ni Yuri pa. “Nagbaligya siya sa iyang unod ug dungog. Daghang pamilya ang naungkag tungod kaniya. Busa dili ikalimod nga daghan ang nasilag ug nayugot kaniya. Ilabi na gayod kadtong mga sakop sa banay nga naguba ang malinawong pagpuyo tungod kaniya.”

Wala motingog si Salie. Daklit nga nahinumdoman sa dalaga ang nahitabo sa ilang pamilya. Naungkag kini tungod sa pagpamabaye sa iyang papa. Tungod sa maong hitabo, natisok sa iyang galamhan ang kasilag ngadto sa mga lalaki. Nahimo siyang man hater. Ug misamot pa kini dihang nabiktima ang iyang manghod sa lalaking wala’y puangod. Nanganti siya nga panimaslan ang lalaki nga maoy nakasala sa iyang igsuon.

Human sa daklit nga kahilom, si Salie namulong. “Posible usab kanang imong pagtuo, Yuri.”

“Apan sa pagkakaron mga pangagpas pa lamang kini,” ni Yuri. Maklaro unya kining tanan kun mailhan ug masikop na ang kriminal.”

Nahilom si Salie. Mao na lamay iyang giatiman ang iyang pagmaneho. -- Sumpayan pa