Gula 59
Mibukot sa duha ang kahilom. Namatikdan ni Salie nga gitutokan siya’g maayo ni Yuri.
“Alang kang kinsa ang mga bulak nga gipahatag mo sa imong sakop kanako?” si Salie ang mibuak sa kahilom.
Mipakiay sa mga abaga ang ulitawo ug mipahiyom pa nga miatubang kaniya. “Kang kinsa pa man diay kini dili para nimo? Matud nila, ang puting bulak simbolo sa putli nga gugma.”
Wala motingog ang dalaga. Milingkod siya sa silya nga diha sa atubangan sa lamesa sa alagad sa balaod. Gipatong niya ang mga bulak sa ibabaw sa talad — dili aron iuli kini ngadto sa ulitawo.
“Nagtuo tingali ang mga polis sa gawas nga kita managtrato,” ni Salie.
Milabtik ang usa ka idlas nga pahiyom sa panagway sa ulitawo. “Nasayod sila nga pure akong ulitawo, ug bisan makausa wala ako’y gidalang babaye dinhi.”
“Tayim pa, Inspector Cuyos,” ni Salie pa. “Wala ako moanhi aron maghisgot nianang mga butanga. Ug labaw nang wala ako moanhi aron magpapangulitawo nimo.”
“I know,” matud sa ulitawo. “Pero igo lang ako nga misumpay sa imong gisulti.”
Mora’g natuok si Salie. Siya man tuod ang nag-una sa estorya ug mitubay usab kaniya ang ulitawo. Mibati siya’g diyotay’ng kaulaw sa iyang gihimo.
“Nakagusto ka ba niining mga bulaka?” matud na usab sa inspector nga mihapyod-hapyod sa tumoy sa usa ka bulak.
“Peach ang paborito kong kolor.”
“Dili kana problema. Sa sunod mao na kanay ihatag ko kanimo.”
Wala motingog ang dalaga. Nahilom usab si Yuri nga iyang namatikdan nga mopanagsang pasiplat kaniya.
“Okey,” mikalit og tingog si Yuri pagkataudtaod. “Estoryahan na nato ang bahin sa giingon nimong mensahe. Unsa man kana?” -- Sumpayan pa