Man hater

“Kun mao, unsa may buot ipasabot niini? Nganong nagpadala man siya niini kanimo?” “Nagduda ko, Vil,” ni Salie.

“Nga unsa?” Wala’y bisan usa ka landong sa pangagpas ang misantop sa pangisip ni Vilma kun unsa ang diha sa hunahuna ni Salie.

“May lain pang biktimahon ang mamumuno,” laktod nga tubag sa dalaga. “Dios ko! Tingalig kita ang isunod sa misteryosong killer!” ni Vilma nga bisan og gipaagi sa komedya ang iyang pagsulti niini apan tinuod gayod nga nahadlok siya.       Si Salie wala magtingog, igo lamang mitutok kang Vilma. “Unsay imong buhaton karon?” matud ni Vilma pagkilab sa usa ka daklit. Wala’y tubag. Mitindog si Salie ug maoy gidulong ang nahimutangan sa steel cabinet. Dihay misantop sa iyang hunahuna niadtong higayona. Usa sa mga drawer sa kabinet iyang gibuksan ug gikuha ang usa ka gamay’ng kuwaderno nga gisulatan niya sa mga importanteng tawo, address ug numero sa ilang telepono.

Gitawagan niya si Yuri sa police headquarters. Samtang naghulat ang dalaga kun unsay maayong approach ngadto sa lalaki human niya kini kasab-i niadtong pagpamisita niini kaniya sa iyang gipuy-an. Wala pa sila magkasulti sukad niadtong hitaboa.

Kinahanglang magkasulti sila si Yuri karon. Mahinungdanon kaayo ang iyang tuyo sa ulitawo. Iyang ipahibalo sa alagad sa balaod ang nadawat niyang mensahe gikan sa tawo nga wala magpaila.

“Good morning. Kining...mahimo bang ikasulti si Chief Inspector Yuri Cuyos? Yes, Umm...Salie Valle...thank you.”

Gitawag sa nakatubag si Yuri. Samtang nagpaabot si Salie, gisaog ang iyang galamhan sa nagkadaiyang hunahuna. Dili kaha lainon pagsabot ni Yuri kining iyang pagtawag nga siya mismo ang nanghagad? Unsa kahay iyang bation kun magkasultihanay na gayod sila si Yuri? Kini ug uban pang pangutana nakadugang sa kakulba sa iyang dughan. -- Sumpayan pa