Man Hater

Gula 44

Ug iyang gisuginlan si Yuri sa nahitabong pagkaungkag sa ilang pamilya gikan sa pagbiya sa ilang amahan kanila nga maoy hinungdan sa kamatayon sa ilang inahan hangtod sa pagkamabdos sa iyang manghod nga nagtubok usab dihang wala na mopakita ang lalaki nga nakasala sa kahimtang niini.

“Mao kana’y hinungdan nga nawad-an ako’g pagsalig sa mga lalaki,” wala’y lipudlipud si Salie nga mipadayag sa atubangan sa ulitawo. “Dili ko tuyoon nga magsurok ang akong dugo. Nakapanumpa ako nga dili gayod manarato.”

“Ayaw i-angin ang ubang mga lalaki sa sala nga nahimo sa usa o duha,” hinay ang tingog ni Yuri, may tuno sa kalumo. “Dili tanang mga lalaki mapahimuslanon. Unfair kaayo kun tungod lang sa sayop sa usa ka lalaki sagapon mo na ang tanan sa pagpanghimaraot.”

“Nagpa-wala’y labot ka ba?” gitutokan ni Salie ang ulitawo.

Nahitan-aw si Yuri kaniya. Dayon miduko kini nga ingon sa wala makasugakod sa pakigharong sa hait niyang tinan-awan.

“Pareho kamong tanan, Inspector,” matud ni Salie. “Tam-is kamong mamulong ug larinong motalutalo aron maangkon ang pagsalig sa usa ka babaye. Labi na kay usa ikaw ka polis.”

Mora’g natuk-an si Yuri sa gipamulong sa dalaga.

Dugay nga naamang si Yuri. Mora’g dihay bukog nga mikalit pag-ali sa iyang tutunlan. Aduna siya’y natugkad kang Salie-lahi kini sa kadaghanan sa mga babaye sa panahon. Namatikdan niya nga segurista ang dalaga. Dili kini sama sa uban nga modayon og lukso bisan unsay dangatan. Dili daling patuohon og estorya si Salie. Apan nangatarongan pa siya.

“Ayaw hukmi ang pagkatawo sa usa ka polis, Miss Valle,” ni Yuri. “Dili ang tanan daotan. May nahibilin pang matarong ug matinud-anon sa gipanumpaan nga katungdanan.” -- Sumpayan pa