Man Hater

Gula 43

Wala dayon makatingog si Salie. Mikalit pagkuba ang iyang dughan. Wala siya makasabot sa iyang gibati pagkakita sa wala damhang bisita, si Chief Inspector Yuri Cuyos.

“Miss Valle,” matud ni Yuri pagkilab sa usa ka daklit.

“A...d-dayon, Inspector,” mikurog og diyotay ang iyang tingog.

Diha sa lagwerta nanglingkod sila sa puthaw nga lingkoranan.

“Unsang hangina ang nakapadpad kanimo nganhi?” nangutana ang dalaga. Gipaningkamotan niya ang pagtago niadtong kalipay nga iyang gibati nga nakita ang maskulado ug guwapo nga alagad sa balaod.

“Giduaw tika,” laktod nga tubag sa batan-ong polis. “Mahimo bang samokon ko ikaw karon?”

“Unsa pay akong mahimo?” sa dalaga pa. “Nia ka na man.”

Nakapahiyom og hilaw si Yuri. Ingon sa nakasabot kini nga dili unta modawat og bisita si Salie apan mirespetar lang ang dalaga kaniya.

“Tuod diay,” ni Yuri. “Sukad sa akong pag-abot kaganina wa koy laing tawo nga nakita dinhi gawas nimo. Hain man diay ang imong mga ginikanan? Ang imong mga igsoon?”

Kalit milandong ang nawong ni Salie. Natingala si Yuri sa gipakitang reaksiyon sa dalaga. Gitutokan niya’g maayo ang dalaga.

“Miss Valle, ngano?” nangutana ang ulitawo.

“W-wa na sila, Inspector,” hinay nga tubag sa dalaga.

“Unsay buot mong ipasabot?”

“Patay na ang akong inahan ug igsoon. Ug wa na ko masayod kun hain ang akong amahan karon.”

Mikunot ang agtang ni Yuri.Mapangutan-on ang iyang tinan-awan kang Salie. “Nag-inusara ka na lang pagpuyo ning ba’ya?”

Inay motingog hinay’ng yango lang ang gitubag ni Salie. -- Sumpayan pa