Gula 46
“Kuan man gud, Day. Para nako, dili pareson sila si Erik ug Almina.”
“U-unsa?”
“Mao kana. Buotan si Erik. Samtang si Almina, nagbahil lang ang dagway nianang babayhana. Flirt nga dako.”
“Wa tay mahimo ana, Vera. Unsaon ta man kun nagkahigugmaay sila.”
Human sa panagsulti nila ni Vera, si Angeline midali pagpaingon sa comfort room. Didto mihilak siya taman sa ginhawa.
Gipahungaw ni Angeline ang tanang naghuot sa iyang dughan pinaagi sa pagpaagas sa iyang mga luha. Mibakho siya’g maayo.
Gisakitan siya sa kasayoran nga gisugilon ni Vera kaniya mahitungod nila ni Erik ug Almina. Wala siya magdahom sa kapaspas sa mga panghitabo. Nagkarelasyon na diay sila si Erik ug Almina.
Sakit kini alang kang Angeline. Nahigugma man gud siya sa hilom ngadto kang Erik gumikan sa daghang mga katarongan nga siya ray nasayod.
Hinuon, kun tukion gyud pag-ayo, dili niya angay hilakan ang kamatuoran nga iyang nasayran. -- Sumpayan pa