Bawal ang FB

Have a wonderful day and how are you? I just hope that you are in good health always. Just call me Marie, 20 years of age, I am still single.

My problem is all about this boyfriend of mine. Almost two years na ang among relationship, Tita, apan just lately nag-break up mi tungod kay maoy iyang gusto, siya gyud ang nakigbulag nako.

Yes, nakigbulag siya nako 3 days pa lang ang nakalabay. Sukad pa sa una iya kong gibawalan mag-internet o mag-facebook (FB), kay basin unya kuno kun makakita ko og laing lalaki. Mahadlok siya nga dunay laing manguyab nako. Klaro lang gyud kaayo, Tita nga wala siya’y salig nako.

Apan nadala gyud ko og galgal sa akong mga amiga. Lingaw man gud, Tita, kay ako mang mahimamat ang akong mga classmates ug mga higala sa una dihang mga bata pa ug nasayran sa akong uyab nga nag-facebook ko ug nasuko siya. Iya dayon kong gibulagan. Pero kun siya ang mag-facebook dili gyud ko moreklamo, Tita.

Karon gusto niya nga makigbalik nako. Love baya nako kining tawhana. Unsa may angay nakong buhaton? Palihog pasabta ko. Daghang salamat and more power to you.

* * *

Dear Marie,

Boyfriend mo pa lang siya, busa, wala pa siya’y katungod nga i-control ang imong kinabuhi. Ayaw siya anara nga magsunod ka lang kaniya. Aduna kita’y tagsatagsa ka kinabuhi. Apan dili ka magmalipayon kun padayon ka nga i-control sa imong uyab. Dapat nimong ipaglaban ang imong karapatan. Dapat nimong hunahunaon nga ikaw ang dapat mo-decide alang sa imong kinabuhi kay nasayod ka kun unsay ikaayo ug makadaot kanimo.

Pasabta ang imong uyab nga managlahi mo og kinabuhi ug wala siya’y karapatan nga but-an ka. Mosugot ka ba nga hangtud sa imong pagkatigulang adunay tawo nga magbuot kun unsay imong buhaton? Kinahanglan iya kining masabtan, kay kun dili siya kasabot nimo, ayaw na lang ipadayon ang imong gugma kaniya kay nakaseguro ko nga dili ka gyud magmalipayon.

Ingna siya nga dili tanang mag-FB mag-uyab-uyab. Kun mao kini ang iyang hunahuna sa mga tawo nga mag-FB tingali tungod kay mao kini ang iyang buhaton everytime nga mag-facebook ang imong uyab. Busa kun dili siya kasabot nimo, ug padayon siya nga wala’y salig, wala nay rason nga imong ipadayon ang imong relasyon. -- Tita Salie