Mata sa Kasingkasing
Gula 40
“Nasayop man tingali ka, Miss Almina,” nagkanayon si Angeline. “I think you’re barking at the wrong tree.”
“Unsay buot mong ipasabot?”
“Wa may nangilog ni Erik gikan nimo. Kun nabalaka ka nga nagtinguha ko sa pagpakigrelasyon kaniya, nasayop ka. Isipon ko pa ganing dakong utang kabubut-on nimo kun makombinser mo siyang dili na magpaduol nako.”
“A-Angeline...” daw nanglipaghong si Almina.
“Dili ko interesado ni Erik,” pintok nga sinultihan ni Angeline. “Ang nakadaot nimo kay nagpataka ka lang og banghag. Pataka ka lang og pamasangil. Kun interesado ka kang Erik, pwes, imo na siya.”
Wala na magtingog si Almina.
“Nagkasinabot na tingali kita, Miss Almina,” gikan ni Angeline. “Hinaot nga dili ka magbaton og daotang hunahuna para nako.”
Unya migawas na si Angeline sa kan-anan. Nahibilin si Almina sa sulod nga naghinuktok, daw wala sa kaugalingon samtang nagpabiling naglingkod.
Biyernes sa hapon. Si Angeline gihagad ni Vera nga mokuyog niini ngadto sa ilang lungsod sa Mabini. -- Sumpayan pa
- Latest
- Trending
