Man Hater

Gula 34

Sa kahimtang nga gisagbay ang walang bukton sa bukas nga pultahan, nabantang ngadto sa dalaga ang tibuok bayhon sa lalaki. Ambongan si Yuri. Sa iyang tan-aw, mao ra sila’g pangedaron.

Ang nagbarog nga lalaki sa iyang atubangan maora’g batobalani nga dili niya malikayan pagtan-aw. Gitutokan niya pag-ayo ang ulitawo. Giganid niya’g suling ang lalaki gikan sa ulo hangtod sa tiil niini. Lalaki kaayo’g barog, niya pa sa hilom. Wala siya makasabot sa iyang kaugalingon. Samtang gitagbaw niya ang iyang mga mata sa pagtan-aw sa lalaki, namatikdan niya nga mikusog ang butokbutok sa iyang dughan.

“Salie,” misangpit si Yuri kaniya. Daw gidulaan sa dila sa ulitawo ang paglitok sa iyang ngalan.

Mipormal ang nawong ni Salie. Gituyo niya kadto aron dili magtuo si Yuri nga dali ra siyang higalaon. “Miss Valle, Inspector,” miingon siya.

“I-I’m sorry, Miss Valle,” nahilaw ang polis. “Um. Ako nang gipahibalo sa kuwerpo ang maong hitabo. Sa dili madugay moabot na ang mokuha sa patay’ng lawas nga nakaplagan mo ug sa imong trato.”

“Correction, Inspector,” ni Salie nga ingon sa natuok sa gipamulong sa polis. “Dili nako trato si Allan. Siya ang photographer sa among publikasyon maong kanunay kaming mag-uban.”

Namatikdan ni Salie nga midiyong ang mga mata ni Yuri nga mitutok kaniya. Ingon sa salabtonon kaayo ang tinan-awan niini kaniya.

Taudtaod gayod ang pag-ukob sa tinan-awan ni Yuri didto kang Salie. Unya mikipatkipat kini. May amag sa kahimuot nga misihag sa iyang nawong. Ingon sa nahimuot siya sa hilom sa iyang nadungog gikan kang Salie.

“Tingalig masuko siya kun dili nimo angkunon ang inyong relasyon?” ni Yuri pa.

“Wala siya’y angay ikasuko kanako, Inspector. Tinuod ang akong gisulti nga wala kami relasyon. Wala ako’y panahon sa pagpanarato. Ug di ko gustong hisgotan ang personal kung kinabuhi,” pintok nga pamulong sa dalaga. -- Sumpayan pa