Mata sa kasingkasing

“Naputol ang ilang panagsulti dihang gipahunong ni Christopher ang motorsiklo sa tungod sa balay nila ni Angeline. Nanaog dayon si Angeline. Nagpasalamat si Christopher dihang mihatag ang dalaga sa iyang plite.

“Sorry sa nahitabo kaniadto, ha,” nagkanayon si Christopher.

“Ang hain adto?” Mikunot ang agtang ni Angeline.

“Sa akong pagpakigbuwag nimo. Nasayod kong dili to angay nakong buhaton.”

“Kalimti na to. Dugay na tong hitaboa.” Human sa ilang panagsulti, gipadagan na ni Christopher ang motorsiklo. Si Angeline  gisugat sa iyang mga ginikanan ug mga igsuon nga nahinangop sa iyang pag-abot.

Pagkaugma, mibalik na si Angeline sa Tagbilaran. Gisugat siya’g balita ni Vera nga nangita si Erik kaniya.

“Nagkita mi gahapon sa Plaza Marcela,” nagkanayon si Vera. “Nangutana siya’g hain ka.”

 “Unsa may imong gitubag?” Sukit ni Angeline.

“Akong gitug-anan nga mipauli ka sa inyo.” Nahilom si Angeline.

“May gipahatag ra ba siya nimo, Day,” matud ni Vera.

“Unsa man?” Pakisusi ni Angeline. -- Sumpayan pa