Man Hater

Gula 25

Si Salie paghiabot sa publikasyon midiretso sa kantena ug namahaw. Human makakaon, miadto gilayon siya sa buhatan sa ilang editor. Mao pa gayo’y pag-abot ni Mr. Pocholo Suarez niadtong tungora. Mitutok siya’g makaduha ug dayon gihinay pagtukmod ang palid sa pultahan ug misulod.

“Good morning, Sir,” nangatahoran siya.

“Good morning, Miss Valle,” tubag sa hamtong lalaki dungan ang pagtudlo sa lingkoranan sa iyang atbang. “Have a seat.”

“Thank you, Sir.”

Milingkod ang dalaga sa gitanyag nga lingkoranan. Miatubang ang editor kaniya.

“Sir,” misugod dayon si Salie sa iyang tuyo, “nakadawat ako’g tawag gikan sa usa ka tawo nga wala magpaila,” ug gitunol niya ngadto sa editor ang index card nga iyang gisulatan sa eksaktong lokasyon sa lugar nga giingon sa misteryosong tawo kaniya.

“Unya?” sa editor nga mitamod sa papel dayon mitan-aw ngadto kaniya.

“Adtuon ba nako ang maong lugar, Sir? Tingali’g lahing klase sa balita kini?”

“Anaa ra kana kanimo. Wala’y mawala kanimo kun adtuon mo kanang lugara. Dad-a lang si Allan aron makuhaan niya’g hulagway ang unsa man nga inyong makit-an didto.”

“Agrelado, Sir.”

“Hain ba tuod si Allan?”

“Tua sa canteen. Ako na lang hapiton.”

“Sige. Pahibaw-a dayon ko ninyo sa resulta sa inyong lakaw. Okey?”

“Yes, Sir.” Pasalig sa dalaga dayong tindog ug mitalikod.

Nagkasugat sila si Salie ug Allan sa pultahan sa paggawas sa nahauna sa lawak sa ilang editor. Dihadiha gisenyasan kini sa dalaga sa pagsunod kaniya. Daw buot pang mangutana si Allan apan mitalikod na si Salie. Miagpas na lang kini sa dalaga nga wala’y tingogtingog. Nagkalibhay ang potograpo sa iyang itom nga backpack ug ang kamera gisab-it sa iyang liog. Miluwan silang duha sa awto sa dalaga nga nangalimyon sa kahumot sa air freshener ug sa kabugnaw sa sulod sa gipaandar nga aircon. -- Sumpayan pa