Man Hater - Gula 24

I’m sorry, Miss Valle. Di mahimong magpaila ako kanimo. Confidential kaayo. Paminaw na lang sa isulti ko. Ug adtoa ang lugar nga itudlo ko kanimo. Okey?”

“O-okey...”

“Good,” nahimuot ang lalaki didto sa pikas linya. “Dali ra man diay kita magkasinabot, Miss Valle.” Ug tapos sa usa ka katawa miingon kini, “Buyno, paminaw pag-ayo.”

Si Salie naminaw pag-ayo sa gisulti sa lalaki. Gidali niya pagsulat sa usa ka index card ang dapit nga gitudlo sa misteryosong tawo kaniya.

“Unsaon ko pagseguro nga dili tinonto kining imo?” nangutana ang dalaga.

“Dako ang mawala kanimo kun dili ka motuo kanako, Miss Valle. Gusto ko lang ikaw’ng tabangan aron mosikat ka. Aron basahon ug sundon sa mga tawo ang imong artikulo.”

“A-apan nganong...” wala na matiwas ni Salie ang buot pa unta niyang ipangutana kay gibutang na sa misteryosong tawo ang awditibo sa pikas linya. Igo na lang nanghupaw ang dalaga samtang gihinay pagbutang ang awditibo nga iyang gigunitan.

Banagbanag pa lang gani mitimbakuwas na si Salie. Bisan nagbug-at ang iyang mga tabontabon apan wala niya kini panumbalinga. Halos tibuok gabii nga wala siya’y kinatulgan. Nangapkap ang iyang hunahuna sa unsay angay buhaton moadto ba siya sa dapit nga gitudlo sa misteryosong tawo kaniya o dili. Naglibog siya.

Naligo siya’g sayo. Gikan sa banyo presko kaayo ang dalaga. Igo pa gani siyang nakagula sa pultahan sa kaligoanan nangalimyon ang iyang kahumot ug kini daw milukop sa halos tibuok palibot sa balay. Midiretso siya sa iyang lawak nga nagsul-ob lamang og bathrobe.

Human makailis, migawas siya sa balay. Nakahunahuna siya nga sa publikasyon na lang mamahaw. May kaugalingong kan-anan ang Sunlight Publishing alang sa mga empleyado. Gipagawas niya ang awto sa garahe ug pagkataudtaod nagsubay na siya sa lapad nga dalan paingon sa ilang publikasyon. -- Sumpayan pa