Usa ka Adlaw sa Tuig 2050

Gula 5

Paghimuntog sa robot sa bukana sa laboratoryo, giusab na usab niini ang kaugalingon ngadto sa usa ka higanteng tawo nga puthaw. May gidak-on kini nga labaw sa tanang robot nga namugna sa siyentipiko. Nahimuot si Propesor Armstrong nga nagsud-ong sa robot nga iyang hinimo.

“Gidayeg ko ang imong katakos, R-7007,” nagkanayon si Propesyon Jack Armstrong sa dihang nagkaatubang na gayod sila ug ang robot. “Wala gayod ako masayop sa paghimo kanimo. Pinaagi kanimo, matuman ko ang tanan kong mga laraw. Sa dili madugay ako na ang ilhong hawod sa tibuok kalibotan.”

Wala motingog ang robot. Hinuon nakita ni Propesor Armstrong nga misiga ang mga mata niini. Pula nga siga. Daw nagbaga sa tumang kamapungtanon.

“Nga-ngano, R-7007?” nakapangutana ang propesor nga mibatig tumang kahibulong. “U-unsay nahitabo kanimo?”

“Dili ikaw ang angay ilhong hawod, Propesor Armstrong,” nagkanayon ang robot, “kun dili ako!”

“U-unsa?” mikunot ang agtang ni Propesor Armstrong sa iyang nadungog. “Nalimot ka ba nga ako ang nagmugna kanimo busa wala kay katungod sa pagsulti’g ingon niana?”

Tinuod nga mimugna mo lang ako,” matud sa robot. “Apan gihimo mo ako nga mas superyor kay kanimo. Tawo ka lang, Propesor, nga kinahanglang mokaon, moinom ug matulog, mga butang nga wala kinahanglana sa sama kanako nga robot. Mas superyor ako kay kanimo busa ako ang angay ilhon nga labing hawod!”

Ug wala na makahimo si Propesor Jack Armstrong sa pagpanalipod sa iyang kaugalingon sa dihang kalit siyang gipugnit sa puthaw’ng kamot ni R-7007. Wala’y kukaluoy nga gikumot siya sa robot nga iyang hinimo! -- Kataposan