Gula 3
Apan wala makatingog si Pepe. Nakaagpas siya sa tumoy niadtong wala ihinayon pagsulti ni Rose. Ingon gayod siya niini kun masuko, daw sa malimot na lang sa iyang debosyon. Mora siya’g natuok nga naghunahuna niini. May nipis nga panglipaghong nga misihag sa iyang nawong. Apan wala siya magpamatikod kang Rose.
Miduol siya sa panghugasan ug nanghunaw sa iyang mga kamot sa tubig nga gisulod sa palanggana. Gisabonan niya ang iyang duha ka kamot. Pagkahuman giayo’g waswas sa tubig. Human kapahiri ang basang mga kamot sa ugang panapton, mitambong na siya sa talad kan-anan diin gipahimutang ni Rose ang ilang pamahaw.
Apan wala una mokaon si Pepe. Gihulat niya si Rose nga nagsungko sa tulo nila ka anak. Naanad sila nga magdungan sa pagpamahaw kun ania ang tanang sakop sa banay sa balay.
Wala madugay nahibalik si Rose sa komedor. Misunod usab gilayon sa iyang asawa sila si Che-che ug Joel kinsa mipahimutang gilayon sa ilang kaugalingon sa tagsatagsa nila ka lingkoranan. Milingkod si Rose tupad kang Pepe.
Hain man diay si Ramil?” Nangutana si Pepe pagkamatikod nga wala motambong sa talad-kan-anan ang ilang kamagulangan. -- Sumpayan pa