Natagam

Tukma gyung alas otso sa kagabhion, human makalingkod ang akong mga kaubang kandidato nga nangapildi sa miaging piniliay sa 2007, gisugdan ko dayon pagsaysay ang mga tubag sa ilang mga pangutana nganong dili na ako mousab pagdagan sa pagka-konsehal sa nagsingabot nga eleksiyon sa barangay.

“Niadtong panahon nga wala pay suweldo ang Kapitan ug mga konsehal sa barangay, ako ang nanguna sa mga konsehal nga napili ug ang akong ugangan maoy napiling kapitan. Sa maong paninguha nahangyo namo nga matukod ang taytayan diha sa sitio Sawsawan nga maoy nagsumpay sa barangay San Roque ug Tangke. Daghang puso ang among napaugbok. Niadto sang panahona wala pay reklamo sa baha sa tubig kay kanunay’ng limpyo ang mga kanal ug kanunay nga namonitor ang gidaghanon sa namuyo sa barangay. Ang maong pagpangalagad gidayeg sa ubang kabarangayan sa Talisay.” “Wala nako kahinumdom kanus-a naputol ang akong pagpangalagad sa barangay. Ang klaro sa akong panumdoman nga nahanaw ako sa barangay San Roque tungod sa akong pagpanarbaho sa Saudi Arabia sugod sa tuig 1980 hangtod sa tuig 2003. Sa gidugayon nga bayente tres ka tuig nakong panarbaho sa Saudi Arabia, halos wala na nako mailhi sa mga kabatan-onan. Makita lang ko nila ug pipila ka adlaw panahon sa akong tinuig nga bakasyon. Ang kadaghanan nga nasayud sa akong pagkatawo nangamatay na.

“Kun kuwalepikasyon ang hisgutan; sa akong hunahuna dili sad ako mabintahaan. Natapos ako sa kursong ‘electrical engineering’ nga tag-as og grado. Napili akong pangulo sa mga lainlaing kapunongan sa parokya, kapilya ug komunidad; nahimong manedyer sa usa ka departamento sa kompaniya nga gitrabahoan; nakapatapos og unom ka anak sa kolehiyo nga pulos na mga titulado ug may maayong panginabuhi.”

“Sa niaging 2007 barangay eleksiyon, diin gidawat ko ang akong kapildihan, daghan ang akong naamgohan. Akong namatud-an nga maihap lang sa tudlo ang mga tawo nga matawag nako ug tinuod nga amigo. Gi-ulo-ulohan ko sa kadaghanan. Ang nakapait nga palandongon dihang gisinggit-singitan ko sa mga tawo nga badlongon sa katilingban. Dili ko usab sila mabasol kay sila mga bag-ong tubo ug ang kadaghanan dili lumad nga namuyo sa barangay San Roque. Wala sila masayud sa akong gigikanan ug sa akong pagka-ako kaniadto nga isugal sad ang kinabuhi kun gikinahanglan. Sa akong pagpangampanya dili kawad-an ug magsunodsunod nga mga tindera sa pan, beko ug uban pang maka-un. Kusog kaayong motilingtiling ang tindero sa ice cream nga dunganan dayon og singgit sa mga batan-on nga akong duolon ... konsehal ... Guwapoha sa among umaabot nga konsehal uy. Unya sundan dayon ug gutoma Hal, uhawa Hal, walay makaun diha Hal. Hapit na lang moingon nga gahalhal.”

“Ang akong edukasyon, kamatinud-anon ug kaligdong sa pangalagad sa nangaging panahon wala’y epekto. Puwerteng layoa nako sa resulta. Gilupig lang ko og ... Kamo nalay sumpay. Tingali inyo na akong hisabtan nganong dili na ako mo-usab pagdagan niining nagsingabot nga eleksiyon sa barangay. Kamo na lang. Nakakaun nako og tagam.” (Katapusan)