Balik sa gibiyaan nga kalibotan

Gula 17

May karatola nga nagbitay sa ubos nga bahin sa pulthaw’ng sera. Iyang gibasa. Iyang nasuta nga ang maong pahibalo makatubag sa iyang katuyoan. Nagkinahanglan og kargador ang tagdumala sa pabrika. Puyde siya sa maong trabaho. Dihadiha nakahukom siyang mosulay pag-aplay.

Mihinay siya paglakaw paduol sa gate. Apan kalit siyang napahunong. Nadapit ang iyang pagtagad sa estatuwa sa duha ka dragon nga nagbuntaog sa ibabaw nga bahin sa puthaw’ng sera. Gitutokan niya kini’g maayo. Sa iyang hunahuna misantop nga ang maong mga bakunawa daw magbalantay sa ganghaan sa pabrika, andam pagkuniskunis ni bisan kinsang mapangahason.

May pagtuki nga milabtik sa iyang hunahuna. May bahin sa iyang pagkatawo nga natukbil sa estatuwa sa dragon nga iyang nakita. Apan naglisod pagtugkad ang iyang kaisipan. Nahaduko siya ilawom sa kainit sa naghingudto nga adlaw. Nakita niya ang iyang anino nga diriyot na niya matumbi. Napahit niya ang iyang wait. Takulahaw lang, nasigpatan niya ang iyang bukton. Miungot ang iyang panan-aw sa iyang patik sa usa ka dragon. May pagbati siya nga ang iyang nakita nahitakdo sa gituki sa iyang hunahuna.

Mora siya’g naluya. May kahiamgo nga milugdang sa iyang kaisipan. Siya mismo nagbaton diay og dragon. Dili ba kaha kini mahimong babag sa iyang tinguha sama sa estatuwa sa dragon nga nag-atang sa ibabaw sa ganghaan sa pabrika? Ang maong pangutana gipaanod niya sa hangin. Wala siya’y nahikapan nga tubag sa kaugalingon niyang sukna.

Ang pagduhaduha nahimong tubag sa busay sa ilang balangay nga mibugnaw sa iyang laraw. Apan kadiyot ra kining mililo sa iyang hunahuna. Gipabukal kini sa kainit sa iyang tinguha. Mao na lamay iyang naamgohan nga mipaduol na siya sa puthaw’ng sera sa ganghaan sa pabrika. Gipislit niya ang buzzer. Napasigpatan niya ang estatuwa sa dragon nga daw kahambaton nga midungaw kaniya. Gilikay niya ang iyang panan-aw gikan sa maong talan-awon. -- Sumpayan pa