Lover Boy

CEBU, Philippines -  Gipahiyoman ni Gelyn ang Insik niya nga higala nga misaka sa stage ug nakigpares kaniya pagsayaw, apan nagsul-ob lang og brief.

Mihugyaw pag-ayo ang mga tawo kay nalingaw kaayo sila kang Raffy nga naninguha nga masundog ang pamaagi sa pagsayaw ni Gelyn nga nailhan niya sa angga nga Orchids.

Diha g’yoy mga higayon nga mihimo sila’g aksyon nga nagbag-id na ang masi’g nila ka atubangan nga bahin nga nakapasamot paghugyaw sa mga tawo, apan kalit lang nga may mitugpa nga botelya sa beer dapit sa tiilan ni Raffy.

Wala dayon masayri kinsa ang nag-itsa sa botelya sa beer sa stage kay nanindog na ang mga tawo sa tagsa-tagsa nila ka lamesa. Gisul-ob pagbalik ni Raffy ang iyang pantalon ug T-shirt ug mibalik siya sa lamesa nga iyang gilingkoran. Taud-taud, giduol siya ni Gelyn. “Orchids kinsa nagbinuang ganina?” nangutana si Raffy. Nakabantay si Gelyn nga dunay tulo ka tawo nga nagbarug sa daplin ug diha nagtutok kanila. “Naay mga lalaki nga nagsigi’g tutok nato,” giingnan ni Gelyn si Raffy. “Sila ako mga bata-bata, bantay nako,” matud sa Insik. Takulahaw lang nga may mitugdon na usab nga botelya sa beer sa lamesa nga gilingkoran ni Raffy.

Nakita ni Gelyn nga kadtong tulo ka tawo nga nagsigi’g tutok kanila sa may bongbong milihok dayon ug giduol ang tawo nga nag-inusara nga naglingkod sa lamesa. Ilang gitabangan og gunit ang maong tawo, gibinaklid. Nakita ni Gelyn nga usa sa tulo ka bata-bata ni Raffy nakakuha og armas gikan sa tawo nga gitabangan nila’g gunit.

“Hala? Si Boy?” nakatuaw si Gelyn dihang naklaro na niya ang tawo nga gitabangan og gunit sa mga bata-bata ni Raffy kay gipasiga na ang suga sa bar. Pipila na lang ka tawo ang nahabilin kay naglumba og panggawas ang uban sa kahadlok. “Polis na siya Raffy! Kaila ko niya,” giingnan ni Gelyn ang Insik.

“Oki, bisan siya polis dili ko pasaylo niya, ako kiha,” matud ni Raffy. May nangabot nga polis ug gidakop si Boy, ilabi na nga nasakpan kini nga nagdala og armas sulod sa bar. “Gelyn! Gelyn, tabangi ko Gelyn,” nagpanawag si Boy kang Orchids sa wala pa dad-a sa mga polis.

Nagtinutokay sila si Raffy ug Gelyn. “I want to be with you later,” giingnan ni Raffy si Gelyn. “No problem, but I don’t want your bodyguards,” giingnan ni Gelyn ang Insik. Taudtaud nagsakay na sila sa sakyanan ni Raffy. Gusto ni Gelyn nga ubanan si Raffy aron matilawan usab niya kadtong nag-ugdo ilawom sa brief sa Insik sa ilang pagsayaw ganina. (Kataposan)