Lover Boy

Dali ra kaayo nga midaghan ang mga customer sa Wild Orchids Bar. Nasayran ni Gelyn nga ang mga customer mangutana diay sa gwardya kun anaa ba siya nga naila nga Wild Orchids nga mohimo’g pasundayag.

“Kinahanglan g’yud diay ka nia ka pirmi Gelyn para modaghan ang atong customers,” matud sa floor manager nga si Ronnie. Taud-taud, gikamay si Ronnie niadtong Insikon nila nga customer. Miapil si Gelyn sa pag-abi-abi sa mga customers. “Hi Orchids!” daghan sa mga customer mihikap sa iyang kamot ug bukton. Miduol pagbalik si Ronnie kang Gelyn ug may gihunghong.

“Gusto nga makigtibol nimo Gelyn kanang Insik nga customer. Disinte ra ba nga pagkatawo,” matud sa floor manager. Girespitaran lang ni Gelyn ang pagdapit kaniya sa Insik.

“I’m Raffy. Ronnie tug-an ikaw tag-iya dinhi gusto ko amiga nimo,” matud sa Insik dungan sa pagtunol sa iyang tuo nga kamot kang Gelyn. “Just call me Orchids,” ni Gelyn pa.

Nagsigi’g tutok si Raffy kang Gelyn. “Ikaw gwapa kaayo. Gusto ko nimo,” prangka kaayo si Raffy. Igo lang mipahiyom si Gelyn ug miingon “Thanks.”

Misugod na pagsayaw ang mga dancers. Gilahi nila ang ilang estelo pagsayaw nga lahi kay sa sagad makita diha sa mga bar. Mokuha sila og usa ka lalaki gikan sa customer nga mouban kanila pagsayaw sa stage.

Mas nalingaw niini ang mga customer kay makahigayon man sila pagsayaw uban sa mga dancer. Dili hinoon daghan ang mosayaw kay ang lalaki nga mopares sa dancer kinahanglan usab nga magsul-ob lang og brief.

“Orchids! Orchids! Orchids!” milanog ang singgit sa mga customers nga nagdemanda nga si Gelyn ang pasayawon. Misulod si Gelyn sa dressing room ug gisul-ob niya ang seksi kaayo nga costume nga giandam sa iyang mga dancer para niya.

Seksi g’yud kaayo si Gelyn. Gisinyasan dayon niya gikan sa dressing room ang DJ nga mosulod na siya sa flatform. “Please welcome, Wild Orchids!” mubo nga introduksyon sa DJ, dungan sa tugtog “Dancing Queen.”

Makabungog ang pakpak sa mga customers. Natan-aw ni Gelyn nga misamot kadaghan ang mga customers nga misulod sa bar nga ang uban wala na makalingkud. Misinyas si Gelyn sa audience kun kinsa ang mopares kaniya sa stage.

Nakalitan si Gelyn kay misaka sa stage si Raffy. Gihukas dayon ni Raffy ang iyang karsones ug T-shirt dungan sa makabungog nga pakpak sa audience. (Sumpayan)