Lover Boy

Gula 5

Nakahimo g’yud og tulo ka hugna sa ilang kumbati sa kama sila si Orchids ug ang polis nga si Boy. Hayag-hayag na nga mibiya si Boy sa balay ni Orchids.

“Balik ka unyang gabii ha?” giingnan ni Orchids ang polis apan wala kini mopasalig. Mihigda og balik si Orchids sa lawak ug iya na usab nga gihanduraw ang mga panghitabo sa iyang kinabuhi.

Natimbang-timbang ni Orchids nga lahi usab og estelo si Boy sa pakigromansa’g babaye unya mas paspas kini’g lihok kay sa ubang mga lalaki nga miagi sa iyang kinabuhi.

Gusto ni Orchids nga dunay rebansin nga mahitabo tali kanila inigka-gabii. Giareglar kadiyot ni Orchids ang iyang kaugalingon atubangan sa salamin kay nahukman niya nga mokaon sa silingan nga kan-anan.

Didto sa kan-anan, nabantayan ni Orchids nga mikalit kahilom ang mga nangaon sa iyang pagsulod ug daw ang ilang mga mata diha gipunting kaniya.

Gigil-asan kaayo siya sa maong sitwasyon. Gipaputos ra ni Orchids ang iyang gipalit kay daw mahilis siya nga gitabangan og tutok sa mga mata sa mga tawo nga didto sa kan-anan.

Human makakaon si Orchids, gitawgan niya ang iyang floor manager sa Wild Orchids Bar. “Kumusta ang atong sales kagabii?” iyang gisukna ang floor manager.

“Gamay ra nga mga customers ang miadto Gelyn… ang uban nagpangita nimo samtang dunay nakahibalo sa hitabo nga igo ra nga nagpakisayod,” matud sa manager.

Wala magdugay og pakig-estorya si Orchids sa iyang manager. Nakasabot siya nga maalkanse g’yud ang iyang bar kun dili siya moadto. Nahukman ni Orchids nga moadto siya sa bar inigka-gabii ilabi na nga walay klaro nga mobalik si Boy sa balay.

Sayo nga nag-andam si Orchids, naligo ug nagpaanyag sa kaugalingon. Mibiya siya sa balay sa wala pa ang kilum-kilom. Gituyo niya kini kay mahadlok siya nga magabhian sa balay nga walay kauban.

Sa bar, nahinangop kaayo ang mga dancers nga miabut si Orchids. “Mosayaw ko karong gabhiona, andami ko ninyo og labing seksi nga costume para unya.”

Gitigum niya ang mga dancers ug gitudloan sa mga pamaagi unsaon nga ganahan ang mga customers nga mosud-ong kanila. “Gabii sus ang mga tawo moinom lang og usa ka botelya manglakaw pagkasayud nga wala ka Orchids.”

Unang misulod ang usa ka tawo nga may pagka Insik. Miorder dayon kini’g beer ug nakigtibol sa usa sa mga dancers. (Sumpayan)