Ang sinugdanan anaa sa kataposan - Gula 81

Apan nasabtan dayon ni Colleen ang hinungdan sa kasubo sa iyang maguwang. Nakapaniid man gud siya nga dugay-dugay nang wala mobisita si Jack sa ilang gipuy-an. Gimingaw na tingali ang iyang ate Alexa ngadto sa boyfriend niini.

“Nag-away ba mo si Jack, Ate? Nangahas sa pagpangutana si Colleen sa iyang maguwang dihang nakahigayon siya sa pagpakigsulti niini.

“Wa man,” mubong tubag ni Alexa nga ingon sa wala gyu’y kadasig.

“Wa na man lagi siya moanhi sa ato?”

“May importante lang siyang giatiman.”

Wala na mangutikuti’g dugang si Colleen. Alang kaniya, igo na ang maong kasayoran nga gibutyag sa iyang maguwang.

Apan dili diay kini ang hinungdan sa kasubo ni Alexa. Karon pa motug-an si Alexa kaniya nga migawas na diay niadtong miaging Semana ang resulta sa board exam sa mga nursing. Ug nahagbong si Alexa sa maong pasulit.

“Sagdi lang, Ate,” gialam-alaman ni Colleen ang maguwang. “Basin sa sunod higayon makapasar ka na.”

“Wa na koy planong mo-take two,” untop nga tubag ni Alexa nga nakapahingangha pag-ayo ni Colleen.

Ang labing dakong kasub-anan sa kinabuhi sa maguwang ni Colleen nahitabo paglabay sa duha ka bulan. Wala na matago ang matuod nga kahimtang ni Alexa ngadto sa ilang mga ginikanan. Mabdos kini! Si Jack ang amahan sa bata nga gisabak niini. -- Sumpayan pa