Ang sinugdanan anaa sa kataposan

Gula 69

Human mangaon sa outlet sa Orange Brutus sa Elizabeth Mall, nagkasabot sila si Colleen ug Brandon nga manan-aw og sine. Maoy ilang gitan-aw ang kontrobersiyal nga pelikula nga Da Vinci Code nga naghisgot nga may relasyon sila si Jesucristo ug Maria Magdalena.

Naghuot sa daghang manan-away ang sulod sa sinehan. Nagseguro si Brendan og usa ka lingkoranan nga kalingkoran ni Colleen. Dihang nabakante ang lingkoranan sa iyang tupad, mao pay paglingkod ni Brendan.

Namatikdan ni Colleen nga mi-behave si Brendan. Wala gani kini mosulay bisan paggunit na lang sa iyang kamot sukwahi sa gihimo niini sa una nilang panag-uban sa pagtan-aw og sine. Misantop sa hunahuna ni Colleen nga nag-iklam na si Brendan, kaha nahadlok nga iya na usab nga ma-foul.

Alas siyete imedya sa sayong kagabhion. Maoy paghiuli ni Colleen sa ilang gipuy-an sa Banawa gikang nanuroy uban kang Brendan. Gihatod siya ni Brendan.

Diha na ang iyang mga ginikanan sa ilang pag-abot. Sanglit Domingo man, sayo usab silang nanira sa ilang puwesto sa prutasan didto sa Carbon ug namauli og sayo.

Nakaila na ang mga ginikanan ni Colleen kang Brendan. Nasayod na ang iyang Papa Omer ug mama Isabel sa relasyon nila ni Brendan. Gipasagdan lang sila sa iyang mga ginikanan nga nagsultihanay diha sa sala. -- Sumpayana pa