Nakahunahuna si Danica sa pagsibat samtang may igong gilay-on si Jeffrey sukad sa iyang nahimutangan. Apan wala niya ihinayon ang misantop sa iyang hunahuna. Kun molighot siya pag-ikyas, basin og maapsan ra usab siya ni Jeffrey ug masuko na hinuon kini kaniya.
Ang maayo niyang buhaton karon mao nga magpaitoy-itoy siya ni Jeffrey. Sundon niya ang tanang imando niini kaniya aron dili kini masuko ug tumanon sa lalaki ang gisaad niini kaniya nga papaulion siya kun maseguro na niini nga dili na kini masundan sa kapolisan.
“Mopadayon na ta,” ni Jeffrey pa nga miduol kaniya.
“A-asa pa man diay ta?” Miliraw ang mga mata ni Danica sa palibot.
Iyang nasuta nga ania na sila sa taliwala sa dakong lasang.
“Mopadayon ta sa unahan,” matud ni Jeffrey. “Mangita ta’g kapahulayan.”
Nanglakaw sila. Nag-una si Jeffrey. Nagsunod si Danica. Kun buot pa gyud ni Danica nga moikyas, mahimo gayod unta niya kini sa dakong kasayon kay ingon sa kompiyansa ra kaayo si Jeffrey kaniya. -- Sumpayan pa