Sulagma nga Panagkita

Gula 6

Gikan nga milili sa rehas sa bentana ngadto na lahos sa pultahan, nagdali si Janet nga mibalik sa nahimutangan ni Ronel.

Daw gikulbaan kaayo si Janet nga wala mahimutang samtang padayon ang pagtuktok sa pultahan. “Si Larry kanang anaa sa pultahan nanuktok Ronel… siya ang giingon nako nga kanunay’ng naghasol kanako,” hagawhaw ni Janet.

“Buyno, ablihi ang pultahan ug pasudla siya Jan. Ayaw tug-ani nga duna kay kauban dinhi sa balay,” tuod midali pagtago si Ronel ug giablihan ni Janet ang pultahan sa balay.

“Maayo kay giablihan ko nimo Janet,” ingon sa bug-at og tonada ang sinultihan ni Larry. “Nganong dia ka?” gipangutana sa dalaga si Larry.

“Sa gihapon padayon nga nangindahay nga sugton na ko nimo. Nasayud ko nga ikaw ra karon ang dia sa balay kay nakita nako ang imong mga ginikanan nga milakaw kaganina pa,” ni Larry pa nga naglingi-lingi sa palibot.

Kalit lang gigunitan ni Larry ang palad sa dalaga, apan abtik si Janet nga mibunlot niini. Mikatawa si Larry. “Dili ako mobiya karon dinhi Janet nga dili nako maangkon ang imong gugma.”

Daw gikuyawan si Janet sa gisulti ni Larry. “Unsay buot mong ipasabot?” Mipahiyom si Larry og gihikap na usab niini ang suwang ni Janet. “Kanindot g’yud nimong hagkan Janet.”

“Ayaw gani pagbugal-bugal Larry… sige makalakaw ka na,” ni Janet pa nga mihana sa pagtindog, apan kalit kaayo siya nga gigakus ni Larry. “Maako ka na karon Janet kay kita ra dinhi sa inyong balay! Walay makatabang kanimo!”

Gitukmod pagsuway ni Janet si Larry apan wala makapiog ang iyang kusog. Gigakus hinuon siya ni Larry og gihagkan. “Buhii si Janet Larry! Salbahis ka nga pagka lalaki!” nakurat si Larry sa kalit nga pagtungha ni Ronel.

“Lakaw na Larry, biya na dinhi ug ayaw na pagbalik,” singgit ni Janet. Apan inay mibiya, giduol hinoon ni Larry si Ronel ug nagsugod ang ilang pagsukdanay sa kusug.

Gikulbaan kaayo si Janet sanglit maskulado si Larry kay kang Ronel. Apan nakita ni Janet nga daw yano lang ni Ronel nga gipangsagang ang sukmag ni Larry ug usahay iya kining bawsan.

Nakita ni Janet nga mihunat si Ronel sa iyang kusug ug natumba si Larry dihang naigo sa kumo ang iyang apapangig. Nag-aguroy sa kasakit si Larry. Mihana pagbangon apan gipatiran pa gayud ni Ronel. (Sumpayan)