Gula 48
“Nagpasalamat sab ko sa kadaogan nga akong naangkon,” ni Jackie pa. “Wala gyud makawang ang akong effort. Pero wala gyud ko magdahom nga akoy makakuha sa tropeyo sa pagka-best actress. Daghan kaayo ang mga strong contenders sa maong titulo, mga artista nga una pa nako sa duyan.”
“Dili lang ang mga beteranong artista ang may katungod nga mahimong best actress. Kun maayo gyud ang performance sa usa ka artista, veteran man siya o dili, may kahigayonan siya sa pagdaog. Ang nakanindot sa imong kadaogan kay wala ka mag-inusara. Si Jerome nga imong ka-loveteam mao usab ang best actor. Kini igo nang pamatuod nga angay nang tawgon ang inyong tandem og best and hottest loveteam sa nasud karon.”
Wala motingog si Jackie. Wala siya ganahing mitubay sa ulahing gipamulong sa iyang manager.
“Maayong senyales kining inyong pagdaog,” ni Joy Lorenzo pa. Tungod niini, maka-demand na kita sa mga producer og mas taas nga talent fee sa sunod unya ninyong movie project.”
Misamot ang kabantog ni Jackie Rojas tungod sa iyang pagdaog isip best actress sa Pilipino Film Festival. Ang mao niyang kadaogan maoy naghatag kaniya og dugang maayong oportunidad sa iyang career.
Daghang mga independent movie outfit nga mitanyag og movie project kaniya. Apan ang iyang manager nga si Joy Lorenzo wala dayon mo-commit ngadto sa maong mga prodyuser. Namili sila’g maayo nga proyekto. Kanang pelikula nga klasiko ug dili biya sa kalidad. -- Sumpayan pa