Gahi pa ang ubo

Tigulang na si Leandro sanglit kay ang iyang panuigon dul-an sa kapitoan ka tuig. Apan, ning iyang panuigon mahilig pa gihapon siya sa babaye. Tinuod, minyo siya apan, taod-taod nang nagkabulag siya ug ang iyang asawa nga si Lalay.

Niadtong magtiayon pa sila, matud pa ni Lalay, labihan kuno kahigal kini si Leandro kay dili kuno makontento kun kausa lang mogamit sa asawa matag adlaw. Ang gusto ni Leandro, niadtong batan-on pa siya, dulgan niya ang asawa maghapon. Tungod niini, kanunay maglagot si Lalay.

“Naunsa ka ba, Leandro, gusto mo nalang nga magdulog kita, asa man kita’g makaon kun kanunay na lang kita ingon niini maghapon?” usa ka buntag, bagulbol ni Lalay.

“Mao lang kanang itabang mo sa pamilya?”

“Ay, Lay. Dili mahimo ang magtiayon kun wala kana,” tubag ni Leandro. “Busa, relaks ka lang, Lay. Sa sunod semana, duna na akoy trabaho.”

“Trabaho sa imong kagaral. Maayo pag maglanay kag putot.”

Ang nahitabo, nagkabulag gayod ang magtiayon pagkatapos sa lima ka tuig sa ilang panagtiayon. Matud pa ni Lalay, ingon sa dili na niya maantos ang pakigpuyo kang Leandro kay duna kini pagka tapolan, hilabihan pa gayod kini ka ulagan butang nga dili na maagwanta ni Lalay.

Nanglabay ang mga katuigan sa kinabuhi ni Leandro. Midagko na ang ilang mga anak ug hangtod karon nga usa na ka tigulang si Leandro ug taliwala sa iyang pagka tigulang kaha wala na siyay asawa, mahilig na siyang maglingaw-lingaw sa mga night clubs kana kon duna siya’y kuwarta.

Kanunay siyang mosulod sa mga disco house ug balay kalingawan para pagpalabay sa panahon. Wala na gani siya makaalinggat nga duna siyay mga anak nga nagkinahanglan sa iyang pagpangga ug pagmahal.

Usa ka gabii niana, kaha duna siyay kuwarta, misulod siya sa usa ka night club. Hinuon, dili lang kun kausa lang siya mosulod sa mga dapit nga sama sa night club ug tungod niini, nakabaton siyag mga higala nga babaye sangko-anan sa iyang pag-inusara sa kinabuhi. Didto si Leandro misulod sa night club kun diin didto ang iyang higala nga si Cora nga hilabihan kaayo ka komedyante.

“Maayong gabii, Cor,” pangatahoran ni Leandro sa iyang higala samtang duna kini giatiman nga kliyente.

“Maayo usab nga gabii, Noy Leandro,” tubag sa babaye. “Maayo kay nia ka. Hinaot nga monindot ang akong gabii karon.”

Tungod kang Leandro, medyo nabiyaan ni Cora kadtong una niyang kliyente.

“Hatagi akog beer, Cor. Kanang bugnaw ug pareho kanimo kalami.”

“Lami unya. Ang problema Noy kay bugnaw pa man sa manikop kanang imoha.”

Unya human makainom si Leandro og beer, miagni kini kang Cora nga manulod sila sa kuwarto.

“Unya Noy Leandro, andam kana ba sa kombati?”

“Si Cora baya, morag mao pa.”

Unya samtang dunay gikuha si Cora sa gamay nga lawak, nabati ni Cora nga miubo si Leandro.

“Unsa man kana Noy Leandro, TB o ubo-ubo lang,” komedya ni Cora. “Sa akong tan-aw Noy Leandro, gahi pa kanang imong ubo kay sa nianang imo.”

“Kadaghan pa sa imong estorya, Cor,” pulong ni Leandro nga naglagot. “Unsa? Gusto kag kuwarta?”

“Hipusa na lang kanang imong kuwarta Noy Leandro kay basin kun atakihon ka lang sa imong ubo.”

Milakaw si Leandro nga naglagot kang Cora tungod sa pagbugal-bugal niini kaniya unya misaad kini nga dili na moadto sa lugar ni Cora. (Kataposan)