Kamatayon sa Panumpa

Gula 20

Usa ka higayon niana, dihang nahalin na ang tanan nilang baligyang mga pagkaon sa ilang puwesto sa atubangang bahin sa Metropolitan Cathedral, nagkuyog sila si Xenia ug Nanay Lourdes niya nga nangompra sa Carbon.

Samtang sila namalit sulod sa merkado, kalit lang may milanog nga mga buto-buto sa mga armas dili layo sa ilang nahimutangan. Nagdinaganay ang mga tawo. Unya nakita ni Xenia nga nikalit lang og kalup-og ang iyang inahan. Naigo kini sa saag nga mga bala gikan sa mga armas sa mga tulisan ug kapolisan nga nagpinusilay.

Maayo gani kay miresponde dayon ang Emergency Rescue Unit Foundation. Gidala gilayon sa tambalanan ang inahan ni Xenia. Gidiretso kini sa emergency room. Si Xenia ingon sa nabalisa pag-ayo gumikan sa kakalit sa hitabo. Gibati niya ang tumang kabalaka sa nahitabo sa iyang inahan.

“Operahanan ang imong inahan, Miss Maglabi,” giingnan si Xenia sa doktor nga nakigsulti kaniya. “Kini lang ang paagi aron makuha ang bala gikan sa iyang lawas.”

Ug nakugang si Xenia sa kadako sa kantidad nga gibungat sa doktor nga maoy gikinahanglan aron maoperahan ang iyang inahan.

Sumala sa doktor, mokabat sa P10,000 ang magasto sa pag-opera sa inahan ni Xenia. Kinahanglang makahatag siya’g pasiunang bayad nga 40 porsiyento aron masugdan na ang pagpahigayon sa operasyon pagkuha sa bala nga nalubong sa lawas ni Nanay Lourdes. -- Sumpayan pa